Buri rwego rukwiye gukurikirana imikorere y’urundi, ni byo bizatuma imikorere y’Inama Njyanama z’utugari zivugururwa kandi bikadufasha gukemura ibibazo byinshi. Umuyobozi w’Akarere ka Nyamasheke Habyarimana Jean Baptiste yavugiye ibi mu nama yamuhuje na za Biro z’Inama Njyanama z’Imirenge n’Abanyamabanga Nshingwabikorwa bayo.

Ni ku nshuro ya mbere inama nk’iyi yari ibaye ihuza ubuyobozi bw’Akarere na za Biro z’Inama Njyanama z’Imirenge n’Abanyamabanga Nshingwabikorwa b’Imirenge nk’uko biteganywa n’Itegeko No 87/2013 ryo ku wa 11/09/2013 rigena imitunganyirize n’imikorere y’inzego z’imitegekere y’Igihugu zegerejwe abaturage mu ngingo yaryo ya 130.

Ubwo iyi nama yateranaga bwa mbere mu mpera z’icyumweru gishize, abagize Biro z’Inama Njyanama z’Imirenge ndetse n’Abanyamabanga Nshingwabikorwa b’Imirenge basobanuriwe impinduka ziri muri iri tegeko rishya kugira ngo zitangire gushyirwa mu bikorwa.

Mu gusuzumira hamwe imikorere y’Inama Njyanama zo mu Mirenge n’Utugari, byagaragaye ko Inama Njyanama z’utugari zidakora nk’uko biteganyijwe, ibi bikaba bidindiza gahunda z’iterambere.

Abagize Biro z'Inama Njyanama z'Imirenge n'Abanyamabanga Nshingwabikorwa mu nama ibahuza na Komite Nyobozi y'Akarere

Umuyobozi w’Akarere yavuze ko kuba uru rwego rudakora bituma abaturage batagira uruhare muri gahunda zinyuranye harimo gutegura ibikorwa by’iterambere no kuzishyira mu bikorwa.

“Niba Urwego rw’Akarere rukora, urw’Umurenge rugakora naho ku Kagari ntibakore, dusa n’abubatse ku musenyi kuko bituma abaturage batagira uruhare mu gutegura no gushyira mu bikorwa imihigo n’izindi gahunda z’iterambere”.

Umuyobozi w’Akarere akaba yasabye abari aho guhita bakora inama mu Mirenge yose bagafata ingamba zatuma Inama Njyanama z’utugari zivugurura imikorere yazo.

Abitabiriye inama batanze ibitekerezo

Zimwe mu ngamba zafashwe, ni uko buri rwego rukwiye kubahiriza inshingano ziteganywa n’itegeko, kandi buri rwego rugakurikirana urundi hagamijwe imikoranire no kugirana inama.

Abari muri iyi nama basanze buri Munyamabanga Nshingwabikorwa w’Akagari agomba kugira mu mihigo ye inama 12 z’Inama Njyanama y’Akagari ku mwaka nk’uko ziteganywa n’itegeko.

Abajyanama bo mu Mirenge bagaragaje ko iyi nama izabafasha byinshi kuko hari ibyo batamenyaga ko biri mu nshingano zabo nk’uko byemezwa na Habiyaremye Etienne uyobora Inama Njyanama y’Umurenge wa Bushekeri.

“Muri iyi nama dusanze hari gahunda nyinshi tutakurikiranaga kandi ari izacu nk’Inama Njyanama. Ariko nitubyinjiramo hari byinshi bizahinduka”, Habiyaremye ni ko abivuga.

Abitabiriye iyi nama kandi baganirijwe ku buryo bwo gukoresha umutungo wa Leta kuko ubu Umurenge ari wo uri gushyirwamo imbaraga nyinshi mu guhabwa ingengo y’imari. Bityo inzego zose zikaba zikwiye ubufatanye mu kureberera rubanda.

Iyi nama ihuza Biro z’Inama Njyanama z’Imirenge n’Abanyamabanga Nshingwabikorwa, iteganyijwe kuba rimwe mu gihembwe n’igihe cyose bibaye ngombwa kugira ngo basuzumire hamwe ibibazo by’itangwa rya serivisi mu Mirenge n’Utugari.

Iri tegeko rishya ryo muri 2013, ryaje risimbura Itegeko n° 10/2006 ryo kuwa 03/03/2006 rigena imiterere, imitunganyirize n’imikorere y’Umujyi wa Kigali. Iri tegeko rinateganya ko mu Nama Njyanama y’Umurenge n’iy’Akarere hinjiramo Perezida w’Urwego rw’Abikorera kuri urwo rwego.