Ni igikorwa cyabereye mu ishuri ryita ku bafite ubumuga rya HVP Gatagara riherereye mu Murenge wa Mukingo kuri uyu wa gatatu.

Cyakozwe n’Ihuriro Nyarwanda ry’Abafite Ubumuga (NUDOR: National Union of Disabilities Organizations of Rwanda), cyitabirwa n’abayobozi batandukanye hamwe n’abanyeshuri, aho bazamuye ijwi mu gihe cy’umunota umwe.

Umukozi muri NUDOR, Turyeshimirwa Jacqueline yavuze ko ari ibintu bitari bisanzwe muri sosiyete ariko ari igikorwa cyabereye mu bihugu bigera kuri 30 hagamijwe kwibutsa ko abafite ubumuga bafite uburenganzira nk’ubw’abandi.

Ati “Ni uburyo bwo gukangurira abanyarwanda cyangwa Isi yose kumva ko umwana ufite ubumuga nawe ashoboye, cyane cyane ya miryango ijya ibahisha kugira ngo nabo baze ahagaragara bagire uruhare mu iterambere.”

Umuyobozi w’ishuri ryita ku bafite ubumuga rya HVP Gatagara, Gatari Jean Baptiste, yavuze ko bigisha abana 725 harimo abagera kuri 299 bafite ubumuga. Yavuze ko bahura n’ibibazo byiganjemo iby’ubushobozi buke.

Ati “Abo dufite benshi ni abaturuka mu miryango ikennye itabasha kubitaho. Ikindi ni ubwumvikane buke bw’ababyeyi bahora bakimbirana bitewe no kuba barabyaye umwana ufite ubumuga.”

Abayobozi bari bitabiriye icyo gikorwa bavuze ko bagiye kongera imbaraga mu gukangurira abantu bose kwita ku bafite ubumuga no kutabaheza.

Umuhuzabikorwa w’Inama y’Igihugu y’Abantu Bafite Ubumuga mu Karere ka Nyanza, Tumusime Shaloni, ati “Tugiye gushyira hamwe ijwi ryacu rizamuke tumenye ngo ni ibihe bikenewe kugira ngo umwana nakenera ubuvuzi cyangwa uburezi abubone.”

Igikorwa nk’icyo cyabereye no mu tundi turere nka Ruhango, Karongi, Nyarugenge, Nyagatare na Rulindo.

Igikorwa ngarukamwaka cyo ‘kuvuza inzogera’ cyashyizweho n’Umuryango Mpuzamahanga wita ku bafite ubumuga ku Isi witwa ‘Foundation Liliane’; Ni ku nshuro ya kabiri kibereye mu Rwanda.

Abana b'abanyeshuri bahawe ubutumwa bubakangurira gukurana umuco wo kudaheza abafite ubumuga

Abana biga muri HVP Gatagara bahura n'imbogamizi yo kuba bavuka mu miryango ikennye itabasha kubitaho uko bikwiye

Abana bigishijwe ko abafite ubumuga ari abantu nk'abandi bityo bakwiye kubabanira neza

Abantu bose basabwe gutanga amakuru y'ahantu haba hakiri umuntu ufite ubumuga uhezwa cyangwa wimwa uburenganzira bwe

Bamwe mu bana biga kuri HVP Gatagara bitabiriye igikorwa cyiswe 'kuvuza inzogera'

Buri wese yazamuye ijwi hagamijwe kwibutsa Isi yose ko abafite ubumuga bakwiye kwitabwaho by'umwihariko

Igikorwa cyiswe 'kuvuza inzogera' ni ubwa kabiri kibereye mu Rwanda

Ikigo cya HVP Gatagara cyita ku bafite ubumuga

Muri icyo gikorwa hatangiwe ubutumwa busaba buri wese kwita ku bafite ubumuga no kubakorera ubuvugizi

Umuhuzabikorwa w’Inama y’Igihugu y’Abantu Bafite Ubumuga mu Karere ka Nyanza, Tumusime Shaloni

Umukozi muri NUDOR, Turyeshimirwa Jeaqueline yavuze ko hagamijwe kwibutsa ko abafite ubumuga bafite uburenganzira nk’ubw’abandi bantu

[email protected]