Umuyobozi w’Akarere ka Nyanza, Ntazinda Erasme, avuga ko kimwe mu bibazo bari bariyemeje gukemura mu mihigo harimo icy’imiryango isembera kuko cyari kibangamiye imibereho y’abaturage.
Yagize ati “Twagombaga kubakira imiryango yasemberaga igera kuri 468, izo nzu zarubatswe. Tukaba dushima cyane inkunga y’abafatanyabikorwa banyuranye dusanzwe dufatanya.”
Ntazinda yavuze ko mu kubaka izo nzu abaturage babigizemo uruhare rukomeye kuko bagiye batanga umuganda.
Yashimiye abafatanyabikorwa avuga ko barimo abatanze isakaro, ibikoresho by’ubwubatsi n’ibindi.
Akarere ka Nyanza gateganya kubakira indi miryango 404 nayo imaze igihe isembera, idafite aho kuba.
Ntazinda yemeza ko bazakomeza gushyira ingufu mu gukemura ibibazo by’imiryango itagira aho kuba kuko kiri mu bidindiza iterambere ryayo.
Bamwe mu baturage bari bamaze imyaka myinshi basembera kubera kutagira aho kuba bavuga ko nyuma yo kuhabona bagiye gushaka icyo bakora kibateza imbere.
Matabaro Abel wo mu Murenge wa Busasamana avuga ko yari amaze imyaka igera ku 10 adafite aho aba ariko yishimiye ko yubakiwe inzu yo kubamo.
Ati “Ubu ndishimye cyane kuko ubuyobozi bwanyubakiye inzu yo kubamo, ndatuje rwose kandi mpora mbasabira umugisha.”
Ntazinda Erasme uyobora Akarere ka Nyanza yavuze ko abafatanyabikorwa bagize uruhare mu gukemura ibibazo by’abaturage muri ibi bihe by’icyorezo cya COVID-19 kuko batanze inkunga ya miliyoni zirenga 150 Frw.
Ayo mafaranga yakusanyijwe n’abafatanyabikorwa yakoreshejwe mu guha ibiryo imiryango itishoboye mu gihe hariho gahunda ya ‘Guma mu Rugo’ no kwita ku bikoresho by’isuku.
Yakomeje ati “Ahanini yagiye mu gufasha imiryango yagezweho n’ingaruka zitaziguye muri gahunda ya guma mu rugo, andi yagiye mu kubaka ubukarabiro, gutanga amasabune n’ibikoresho by’isuku ku miryango itishoboye.”
Icyakora hari imishinga igaragazwa ko yadindiye kubera icyorezo cya COVID-19 irimo nk’uwo kugeza amashanyarazi ku baturage bo mu Murenge wa Cyabakamyi, gusa kuri ubu yongeye gusubukurwa ku buryo mu minsi iri mbere bazaba bacana.
TANGA IGITEKEREZO