Ibi byabereye mu Kagari ka Butansinda mu Murenge wa Kigoma ahagana saa kumi n’imwe za mu gitondo cyo kuri uyu wa Mbere tariki 8 Mutarama 2024.

Ihene bikekwa ko Nshimiyimana n’abandi bari kumwe bari bagiye kwiba bivugwa ko ari iz’umuturage ukorera mu Mujyi wa Kigali.

Gusa ngo ubwo bari barimo gucukura inzu izo hene zabagamo, umugore yarabyumvise ahita avuza induru atabaza abaturanyi be baramutabara, abo bajura bakizwa n’amaguru.

Umuyobozi w’Akarere ka Nyanza, Ntazinda Erasme, yabwiye IGIHE ko aba bajura bongeye kugaruka ku nshuro ya kabiri maze uwo mugore yongera aratabaza abaturage baramutabara, barwana n’umwe muri bo ahasiga ubuzima.

Ati “Byabaye nijoro ni abajura bateye urugo rw’umugore batangiye gucukura arataka baratabara maze bariruka ariko hashize amasaha abiri bongeye baragaruka biba ngombwa ko abaturage barwana, ku bw’amahirwe make umujura umwe ahasiga ubuzima.”

Yongeyeho ko inzego zibishinzwe zatangiye gukora iperereza.