Ibi babisabye ubwo basozaga icyumweru cy’icyunamo kuwa 14 Mata 2015 ku rwibutso rwa Jenoside rwa Nyarubuye, ahashyinguwe imibiri 53 000, kuri uwo munsi hanagaragajwe imibiri 16 ku bw’amakuru yatanzwe n’abagororwa.

Komisiyo y’igihugu yo kurwanya Jenoside CNLG yatangaje ko uwo mushinga wo kuvugurura inzibutso uriho kandi uzatangira gushyirwa mu bikorwa ku ngengo y’imari y’umwaka utaha wa 2015/2016.

Dr. Gasanabo Jean Damascene ushinzwe ubushakashatsi muri CNLG yagize ati: “Inyigo y’uburyo iyi mibiri izashyingurwa k’uburyo buvuguruye yarakozwe, amafaranga arahari mu umwaka utaha turizeza ko bizakorwa.”

Uwamariya Odette umuyobozi w’Intara y’Uburasirazuba yijeje ubufatanye muri iki gikorwa nk’uko basanzwe batanga umusanzu mu bikorwa byo guha icyubahiro abazize Jenoside yakorewe Abatutsi mu 1994.

Nyarubuye ni hamwe mu habereye ubwicanyi bwuje ubugome ndengakamere nk’uko Rwakayigamba Ferdinand yatanze ubuhamya bw’uburyo bicaga abatutsi bakabakuramo imitima n’imyijima bakabyotsa ngo amaraso y’Abatutsi atazabakurikirana.