Polisi yamaze guta muri yombi abasore batatu bafatanwe telefoni zigendanwa 103 zibarirwa muri 601 zibwe mu iduka “Keza Phone” ryo mu Kagari ka Kiyovu, Umurenge wa Nyarugenge, Akarere ka Nyarugenge. Iryo duka ryibwe mu ijoro ryo ku wa 23 Kanama 2013.
Nk’uko bitangazwa ku rubuga rwa polisi y’igihugu aba basore ni Michel Havugimana, Théophile Kamatari, na Pascal Mbonigaba, bakaba bakurikiranweho telefoni zibwe uko ari 601 zifite agaciro ka miliyoni 15 z’amafaranga y’u Rwanda.
Aba basore kandi banafatanwe ibihumbi 242 bari bamaze gucuruza zimwe muri telefoni ziganjemo izihenda zo mu bwoko bwa Samsung bibye.
Nyir’iduka Jean Manirarora yashimiye inzego z’umutekano zitahwemye gushyira ingufu mu gushakisha abibye telefoni, zikaba zigeze ku ntego ndetse zimwe mu zibwe zikaba zigarujwe zikiri mu maboko y’ibisambo.
Manirarora yagize ati “Hari haciye igihe nari ntangiye guheba, ariko polisi yabashije gukurikirana abajura none barafashwe; biranejeje!”
Umuvugizi wa Polisi mu mujyi wa Kigali CSP Urbain Mwiseneza, yashimiye abaturage uburyo bakomeje kubatera inkunga mu gufata abanyabyaha, anakangurira abacuruzi gufata ingamba zihamye bakoresha abakozi bizewe, no gushyiraho ibyuma bifata amashusho (CCTV Camera) mu maduka yabo bagabanya ibyago byo kwibwa n’ubonetse wese.
TANGA IGITEKEREZO