Iyi mpanuka yabaye mu masaha ya saa munani n’igice z’ijoro, ubwo iyo Fuso yari itwawe na Gasirimu Emmanuel yavaga i Musanze yabuze feri maze igonga ako kabari kari ku muhanda munini werekeza i Musanze maze barindwi bari bahari barakomereka, muri bo batatu bakomeretse mu buryo bukomeye; ndetse imodoka na moto byari bihaparitse nabyo birangirika.

Umunyamabanga Nshingwabikorwa w’Umurenge wa Kanyinya iyi mpanuka yabereyemo, Niyibizi Jean Claude, aganira na IGIHE yagize ati “Ni Fuso yari ivuye mu Karere ka Musanze yabuze feri noneho igonga inzu, imodoka na moto byari biparitse aho ngaho, ikomeretsa abantu barindwi bari kuri ako kabari.”

Yakomeje agira ati “Yabuze feri igeze muri ariya makorosi irakomeza aho kugira ngo ikate igana ku Giti cy’Inyoni, arareba abona akomeje ashobora kuyigusha mu mugezi wa Yanza, maze arakomeza agonga iyo nzu.”

Yavuze ko uretse iyo modoka na moto byangiritse, ngo n’iyo modoka yakoze impanuka yangiritse bikomeye kimwe n’ako kabari yagonze.

Niyibizi yakomeje avuga ko iyi mpanuka ikimara kuba hakozwe ubutabazi maze abakomeretse bajyanywa ku bitaro bya CHUK gusa ngo kugeza ubu nta makuru y’uwaba yitabye Imana muri iyi mpanuka arabona.

Ndayisenga Vedaste nyir’akabari iyi modoka yagonze, yabwiye IGIHE ko iyi mpanuka yabaye mu kabari ke harimo abakiriya bane ariko ku bw’amahirwe nta n’umwe witabye Imana uretse umukozi we itafari ryakomerekeje ku mutwe.

Imodoka ya Fuso yavaga i Musanze yakoze impanuka mu rukerera rwo kuri uyu wa Mbere ikomeretsa abantu barindwi bari mu kabari k’ahitwa kwa Gakunzi

Mu byangiritse harimo na Taxi Voiture yari iparitse hafi y'umuhanda

Fuso yacitse feri inangiza ibinyabiziga birimo na moto

Mu gitondo cyo kuri uyu wa Mbere, abaturage bazindukiye mu gikorwa cyo gusukura aho iyi fuso yasenye

Taxi Voiture yagonzwe yarangiritse cyane

Iyi modoka yasenye akabari k'ahazwi nko kwa Gakunzi mu Mudugudu wa Rutagara mu Murenge wa Kanyinya

Abantu benshi bari bateraniye ahabereye impanuka yakomerekeyemo abantu barindwi

Iyi mpanuka yabaye mu masaha ya saa munani n’igice z’ijoro yabereye ku muhanda werekeza i Musanze

Amafoto: Thamimu Hakizimana