Umuyobozi w’akarere ka Nyaruguru Francois Habitegeko yabitangaje kuwa gatandatu tariki ya 02 Gicurasi 2015, ubwo yifatanyaga n’abaturage mu gikorwa cyo kwibuka ku nshuro ya 21 abahoze ari abakozi b’uruganda rw’icyayi rwa Mata bazize Jenoside yakorewe abatutsi muri Mata 1994.

Bamwe mu bafite ababo bahashyinguye bagaragaje ko bifuza ko hakubakwa urwibutso rutunganyije, bijyanye no guhesha icyubahiro abazize Jenoside.

Umuyobozi w’akarere ka Nyaruguru Francois Habitegeko, yatangaje ko uretse urwibutso rugiye kubakwa muri ruganda rw’icyayi rwa Mata, umwaka utaha inzibutso zose ziri mu karere ayoboye zizaba zamaze gutunganwa.

Yagize ati "Ibibazo byakunze kugarukwaho bijyanye no gutunganya inzibutso ndetse no kuzifata neza, ndagira ngo mbabwire ko dufite gahunda yo gutunganya inzibutso zose bikarangirana n’umwka utaha."

Umuyobozi w’uruganda rw’icyayi rwa Mata, Yves Mungakunzwe, nawe yatangaje ko bafite gahunda yuko umwaka utaha bazibuka baramaze kubaka urwibutso muri urwo ruganda.

Yagize" Turateganya kubaka urwibutso rucumbikiyemo abahoze ari abakozi b’uruganda. Ni ikintu twafashemo ingamba zikomeye, turifuza ko umwaka utaha twagaruka hano kwibuka dufite urwibutso rutunganyije kandi rwubatse neza."

Nubwo kugeza ubu mu ruganda rw’icyayi rwa Mata nta rwibutso rutunganyije rurahubakwa, imva ihari ishyinguyemo imibiri y’abahiciwe muri Jenoside bagera kuri 364, barimo 68 bari abakozi b’uruganda.

Umuhango wo Kwibuka wabimburiwe n’igitambo cya Misa, abawitabiriye bunamira kandi banashyira indabo ku mva zishyinguyemo abari abakozi b’uruganda rwa Mata.