Yaba umuhanda wa kaburimbo uri kubakwa n’Ibitaro bya Munini, byose ni ibikorwa remezo bikomeye Perezida wa Repubulika, Kagame Paul, yemereye abaturage bo mu Karere ka Nyaruguru hagamijwe kubageza ku iterambere rirambye n’imibereho myiza.

Uwo muhanda Ndago- Munini w’ibilometero birindwi, ni igice kimwe cy’umuhanda Huye-Kibeho-Munini-Ngoma ureshya n’ibilometero 66, watangiye kubakwa muri Werurwe 2019 biteganyijwe ko uzuzura muri Nzeri 2021.

Umuyobozi w’Akarere ka Nyaruguru, Habitegeko François, yabwiye IGIHE ko imirimo yo kubaka umuhanda wa kaburimbo iri kwihuta ku buryo bizeye ko uzuzurira igihe.

Ati “Imirimo iri kugenda neza ku buryo tubona ko uzuzurira igihe, ntekereza ko n’iminsi mike batakoraga [kubera icyorezo cya COVID-19] bashobora kuba barashyizeho uburyo bwo kukigaruza.”

Habitegeko yavuze ko n’Ibitaro bya Munini bigiye kuzura kuko imirimo yo kubyubaka igeze hafi ku musozo.

Bamwe mu baturage batuye mu Karere ka Nyaruguru baherutse kubwira IGIHE ko bashimira Umukuru w’Igihugu wabahaye uwo muhanda, bityo bakaba biteguye kuwubyaza umusaruro biteza imbere mu buryo butandukanye.

Nkurunziza Alphonse uhinga icyayi yavuze ko yiteguye kugura imodoka izamufasha mu kazi ke.

Yagize ati “Nanjye nzagura imodoka bakimara kuwurangiza izajya imfasha mu kazi kanjye kajyanye n’ubuhinzi nkora bw’icyayi.”

Ibitaro bya Munini aho uwo muhanda werekeza nabyo byatangiye kubakwa ku buryo bugezweho muri Werurwe 2018; biteganyijwe ko bizuzura bitwaye asaga miliyari zirindwi z’amafaranga y’u Rwanda.

Ni inyubako yubatse mu buryo bugezweho, ifite inzu eshatu zigerekeranye, ifite ibyumba 298, ifite ubushobozi bwo kwakira abarwayi barenga 200 icyarimwe.

Ku Munini hasanzwe ibitaro ariko abaturage bifuje ko byavugururwa bagahabwa ibiri ku rwego rwo hejuru, Umukuru w’Igihugu abibemerera mu 2015.

Kuri ubu ibyo Bitaro bya Munini bifite abakozi 94 batanga serivisi z’ubuvuzi, biteganyijwe inyubako nshya nimara kuzura baziyongera bakagera kuri 190.

Abaturage bo mu Karere ka Nyaruguru bavuga ko uyu muhanda bawitezeho iterambere rirambye

Biteganyijwe ko ibitaro bya Munini bizuzura bitwaye asaga miliyari zirindwi

Ibikorwa byo kubaka imihanda ya kaburimbo mu Karere ka Nyaruguru birarimbanyije

Imihanda ya kaburimbo nimara kuzura mu Karere ka Nyaruguru bizoroshya ubuhahirane

Ku Bitaro bya Munini aho uwo muhanda werekeza nabyo byatangiye kubakwa ku buryo bugezweho muri Werurwe 2018

Ubuyobozi bwemeza ko ibikorwa byo kubaka imihanda ya kaburimbo mu Karere ka Nyaruguru biri kwihutishwa

Umuhanda Huye Kibeho Munini Ngoma ureshya na kilometero 66 watangiye kubakwa muri Werurwe 2019 biteganyijwe ko uzuzura muri Nzeri 2021

Umuhanda uva ku Biro by'Akarere ka Nyaruguru werekeza ku Bitaro bya Munini watangiye gushyirwamo kaburimbo

Umuhanda wa kaburimbo mu Karere ka Nyaruguru watangiye kubakwa muri Werurwe 2019 biteganyijwe ko uzuzura muri Nzeri 2021

[email protected]