Icyo gikorwa cy’urukundo cyakozwe ku wa 15 Kamena 2018 n’urubyiruko rukomoka muri ako karere rwarokotse Jenoside yakorewe Abatutsi ariko rukaba ruba mu tundi turere. Urwo rubyiruko rwibumbiye hamwe muri Association les Fraternels Zirikana.

Umuyobozi w’iyo Association, Kabahuza Bernard, yavuze ko igikorwa nk’icyo cy’urukundo bagikora mu rwego rwo kuba hafi ababyeyi babo no kubereka ko batasigaye bonyine.

Ati “Muri iyi minsi 100 yahariwe kwibuka abazize Jenoside yakorewe Abatutsi, tugira igikorwa cyo gutera inkunga bamwe mu barokotse batishoboye kugira ngo tubereke ko batasigaye bonyine kandi tubabwire ko badakwiye kwiheba cyangwa guheranwa n’agahinda”

Mu miryango 20 yatewe inkunga buri umwe waganewe umufuka w’ifu ya kawunga n’umuceri, ibishyimbo n’amasabune ndetse bubakirwa n’uturima tw’igikoni bazajya bahingamo imboga.

Bamwe mu bahawe iyo nkunga bavuga ko bishimiye ko abakiri bato babazirikana bityo bikabereka ko igihugu gifite ejo hazaza heza.

Kankindi Esperance ati “Ntabwo ari ubwa mbere abana bankoreye igikorwa nk’iki cyiza, abana banshizeho ariko mwarasigaye Imana ihabwe icyubahiro. Kuba mudutekereza mukaza kudusura byerekana ko muri abana beza kandi ari mwe muzateza imbere igihugu cyacu”.

Visi Perezida wa Ibuka mu Karere ka Nyaruguru, Ndagijimana Emmanuel, yashimiye urubyiruko rwakoze icyo gikorwa cy’urukundo abasaba kubikomeza.

Association Les Fraternels Zirikana igizwe n'urubyiruko rwarokotse Jenoside yakorewe Abatutsi rukomoka mu Karere ka Nyaruguru ariko bakaba baba mu tundi turere

Bamwe mu rubyiruko bibumbiye muri Association Les Fraternels Zirikana bakoze igikorwa cy'urukundo cyo gutera inkunga abarokotse Jenoside batishoboye

Bamwe mu barokotse Jenoside batishoboye bahawe inkunga y'ibiribwa n'amasabune

Umuyobozi wa Association les Fraternels Zirinaka,Kabahuza Bernard

Mu karere ka Nyaruguru, Abarokotse Jenoside yakorewe Abatutsi batishoboye bagenewe inkunga y'ibiribwa

Umwe mu bahawe inkunga yagaragaje ibyishimo avuga ko urubyiruko rugaragaza ko ejo hazaza h'u Rwanda ari heza

Visi Perezida wa Ibuka mu Karere ka Nyaruguru, Ndagijimana Emmanuel

[email protected]