Kuwa 22 Gicurasi 2015, Urukiko rw’Ubujurire rwa Paris rwarekuye Dr. Twagira, rumushyiriraho amabwiriza kugirango akomeze kugenzurwa n’Ubutabera, aho yategetswe kuguma mu gace atuyemo ka Haute-Normandie no mu nkengero zako gusa akaba atemerewe gusohoka mu Bufaransa atabisabiye uburenganzira.

Dr. Twagira, umuganga w’imyaka 55 y’amavuko, yafatiwe muri i Calvados muri Werurwe 2014, akaba yari umuyobozi w’Ibitaro bya Kibuye mu 1994 ubwo habaga Jenoside yakorewe Abatutsi.

Mu mwaka wa 2009 nibwo Umuryango CPCR uyoborwa na Alain Gauthier watanze ikirego gikubiyemo urutonde rw’ibyaha biregwa Twagira, iperereza rirakorwa ndetse aza gufatirwa mu bitaro bya Vire, aho yakoraga muri serivisi ya “gerontology”, ariko we ahakana ibyo byaha aregwa.

Nyuma yo kurekurwa kwa Twagira, Alain Gauthier, Umuyobozi wa CPCR yagaragaje ko adashyigikiye na gato icyemezo cy’urukiko rw’ubujurire rwa Paris, ati:“Ntitwatekerezaga ko Twagira yarekurwa tugendeye ku byaha aregwa.”

Muri Mata, nabwo urukiko rw’ubujurire rwari rwarekuye Claude Muhayimana, iyo ikaba imwe mu madosiye arimo akurikiranwa n’ubutabera bw’u Bufaransa.

Kugeza ubu, icyo gihugu kimaze kuburanisha urubanza rumwe rwa Pascal Simbikangwa wakatiwe igifungo cy’imyaka 25 muri Werurwe 2014, aza no kujuririra icyo gihano.

Mu mwaka wa 2016, biteganyijwe ko Tito Barahira na Octavien Ngenzi bahoze ari ba Burugumesitiri na bo bazaburanishwa n’Urukiko rusesa imanza, ndetse kandi iperereza kuri Padiri Wenceslas Munyeshyaka na ryo ryararangiye, biteganyijwe ko Ubushinjacyaha butanga imyanzuro.