Perezida wa Repubulika Paul Kagame ari mu Buhinde mu nama y’ubukungu yateguwe n’iki gihugu yitabirwa n’abakuru b’ibihugu na guverinoma baturutse hirya no hino ku Isi.

Iyi nama irahuza Ihuriro Mpuzamahanga y’Ubukungu (World Economic Forum) n’Ihuriro ry’Inganda mu Buhinde (Confederation of Indian Industry-CII), iteganyijwe kubera mu murwa mukuru w’u Buhinde,New Delhi.

Muri iyo nama,Perezida Kagame aratanga ikiganiro ku ishoramari.

Mu bandi bayobozi bayitabira harimo Minisitiri w’Intebe wa Côte d’Ivoire, Daniel Kablan Duncan; Shimon Peres wa Isiraheil; Visi Perezida wa Ghana, Kwesi Amissah-Arthur, n’abandi batandukanye.

Uru ruzinduko rw’umukuru w’Igihugu ruje rukurikira urw’abashoramari batandukanye bakomoka mu Buhinde baje kureba uko bashora imari mu Rwanda.

Mu nama aba bashoramari bagiranye n’ikigo cy’Igihugu cy’Iterambere, RDB, tariki ya 26 Gicurasi 2014, bagarutse ku mahirwe yagombye gusangirwa ibihugu byombi bifite mu ishoramari

Abashoramari b'Abahinde na Minisitiri w'Ubucuruzi n'Inganda François Kanimba

Bemeje ko kutihanganira ruswa, umutekano usesuye urangwa mu Rwanda no korohereza abashoramari ari bimwe mu bituma Abahinde bakunda kuza gushora imari yabo mu Rwanda.

Mu mwaka wa 2013 Abahinde bashoye amadolari ya Amerika asaga miliyoni 35 mu mishinga 12 mu Rwanda. Muri 2012 binjije mu Rwanda asaga miliyoni 47 z’amadolari mu mishinga 13 mu gihe muri 2011 hari imishinga 10 yinjije miliyoni 127 z’amadolari harimo sosiyete ya Airtel yinjijemo agera kuri miliyoni 102 z’amadolari.

Muri rusange mu myaka itatu ishize hiyandikisha imishinga itatu y’Abahinde itatu. Kuri ubu, mu Rwanda hari imishinga minini igera kuri 64 y’ Abahinde.

[email protected]