Perezida Kagame yakomoje ku bagerageza gushakira Rwanda Day ibindi bisobanuro (Video)

Yanditswe na Twarabanye Venuste
Kuya 6 Ukwakira 2019 saa 10:44
Yasuwe :
0 0

Perezida Paul Kagame yavuze ko guhura Abanyarwanda bakaganira bagashaka uburyo bakwihutisha igihugu ngo kigere aho gishaka kugera, nta kinegu kirimo ahubwo ariko bikwiye kugenda, aho guha umwanya abanenga iki gikorwa.

Umukuru w’Igihugu yabigarutseho muri Rwanda Day yabereye mu Mujyi wa Bonn mu Budage kuri uyu wa Gatandatu.

Yakomoje ku banenga Rwanda Day bayita Politiki yo gushaka imbaraga mu Banyarwanda bari mu mahanga, yibutsa ko uyu ari umunsi ugamije guhuza Abanyarwanda bo hanze n’imbere mu gihugu n’inshuti zabo, bakaganira ku iterambere ry’igihugu cyabo, kandi ibyo nta kinegu abibonamo.

Ati “Murabizi muri abo baturuka imbere bagashaka gutangira indege ngo itihuta, ni ibyo dusoma abantu baba bandika ejo nahoze nsoma, abantu bandika ngira ngo bamwe ibyo nasomaga babyandikiraga hano. Mbese harimo nko kunenga Rwanda Day ngo buriya ngo ni politiki yo kugerageza gushaka imbaraga mu Banyarwanda, kubikundishaho, ariko jye nshakisha ikinegu kirimo ndakibura.”

Yakomeje avuga ko unenga ibyo azahora anenga, kuko gusanga Abanyarwanda aho bari hose atari umuco mushya kandi ko bizakomeza.

Ati “Kubera ko n’ubundi njye nari nzi ko ariko bigenda, duhura n’Abanyarwanda tukabasanga aho bari, bagusanga aho uri mukaganira ukabasobanurira, ukababwira icyo ubatezemo, nabo bakakubwira icyo bagutezeho. Niyo politiki nubundi. Naho ibyo gusobanurira Abanyarwanda ngo bashyigikire igihugu cyabo mu nzira kirimo kiyihutemo gishobore kugera aho gishaka kujya vuba, rwose uwanenga ibyo ajye ahora anenga.”

Perezida Kagame yavuze ko abo Banyarwanda bakwiye gukoresha uburyo bwose bwubaka igihugu, naho ibivugwa muri izo nyandiko bihabanye n’uko ibintu byakagombye kuba bikorwa.

Yakomeje ati “Abandi muri iyo nyandiko ngo buriya ni ugushaka Abanyarwanda bafite amaboko mu bihugu byo hanze, ngo kugira ngo batuvugire neza. Icya mbere ntabaturusha kumenya abo bantu bo muri icyo gihugu, nabyo ni byiza ko babikora gutyo. Ikibazo se kiri he?”

“Niko bakwiriye kubikora, bakwiriye kubikoresha ubushobozi bafite aho bari, mu buryo ubwo aribwo bwose. Si n’uburyo bwa politiki nakwibandaho njye, nashaka n’ubundi buryo ahubwo tukabukoresha. Kugira ngo igihugu cyabo kigire izo mbaraga, gishobore kugenda cyihute, igihugu kigere aho twifuza ko gikwiriye kuba kigana. Nabyo niko bikwiriye kuba bigenda.”

Perezida Kagame yavuze ko u Rwanda rukomeje gutera imbere kuko rukora ibintu bizima, avuga ko utakora ibintu bibi ngo ibyo ugeraho bibe ibintu byiza, ati “ntabwo bihura.”

Rwanda Day ni umunsi umaze kumenyekana cyane kandi wagize uruhare runini mu gukangurira Abanyarwanda baba mu mahanga kugira uruhare mu iterambere ry’igihugu cyabo. Uyu mwaka ibaye ku nshuro ya cumi.

Bwa mbere yabaye mu Ukuboza 2010 nubwo uyu munsi utari wakiswe Rwanda Day, aho Perezida Kagame yahaye impanuro abanyarwanda basaga 2400 baba mu Bubiligi; abashishikariza ko bakwiye ‘kwiyizera aho gutegereza ak’imuhana’.

Rwanda Day mu nyito ku nshuro ya mbere yabaye muri Kanama i Chicago ahari abasaga ibihumbi bine, muri uwo mwaka kandi muri Nzeri itaha i Paris mu Bufaransa aho yitabiriwe n’abasaga 3700.

Umwaka wakuriyeho yabereye muri Leta ya Massachusetts mu Mujyi wa Boston ahari Abanyarwanda basaga 3000 aho Perezida Kagame yavugiye ati “ntidukwiye kwemerera uwo ariwe wese kugena abo dukwiye kuba.”

Toronto muri Canada, Londres mu Bwongereza, Atlanta muri Leta Zunze Ubumwe za Amerika, Amsterdam mu Buholandi, San Francisco muri Leta Zunze Ubumwe za Amerika na Ghent mu Bubiligi, niyo mijyi yindi yakiriye uyu munsi udasanzwe.

Perezida Kagame yavuze ko u Rwanda rwatewe amacumu atari make ariko rugakomeza guhagarara rushikamye
Perezida Kagame hamwe na Ambasaderi w’u Rwanda mu Budage, Igor Cesar na Visi Perezida w’Umuryango w’Abanyarwanda baba mu gace ka Bonn mu Budage, Omelie Impundu
Perezida Kagame yakomoje ku bagerageza gushakira Rwanda Day ibindi bisobanuro
Madamu Jeannette Kagame ari mu bihumbi by'Abanyarwanda bitabiriye Rwanda Day mu Budage
Perezida Kagame ubwo yaramutsaga abitabiriye Rwanda Day mu Mujyi wa Bonn mu Budage
Madamu Jeannette Kagame ahoberana n'Umunyamabanga Mukuru wa OIF, Louise Mushikiwabo. Ku ruhande rwabo hari Minisitiri w’Ubucuruzi n’Inganda, Hakuziyaremye Soraya

-  Indi nkuru wasoma: Ibihumbi by’Abanyarwanda bitabiriye Rwanda Day i Bonn- Uko ibirori byagenze (Amafoto na Video)

Amafoto: Philbert Girinema na Karirima A. Ngarambe - Bonn; Rwanda Gov


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza