Mu butumwa Umukuru w’Igihugu yanyujije ku rukuta rwe rwa Twitter, yavuze ko intwari zitangiye igihugu zikwiye icyubahiro. Yagize ati “ Turaha icyubahiro abemeye gupfira indangagaciro zitugira Abanyarwanda. Urugero badusigiye ruduha imbaraga n’icyerekezo bitubereye.”

Ubutumwa bwa Perezida Kagame kuri twitter

Ibi Umukuru w’Igihugu yabitangaje nyuma yaho kuri uyu wa 1 Gashyantare 2017 yifatanyije n’Abanyarwanda bose mu guha icyubahiro intwari z’igihugu. Ni umuhango wabereye mu tugari twose by’umwihariko Perezida Kagame yashyize indabo ku gicumbi cy’Intwari giherereye i Remera.

Aha niho hari ikimenyetso cy’ubutwari bwa Gen. Maj Fred Gisa Rwigema n’umusirikare Utazwi bari mu cyiciro cy’Imanzi; Umwami Mutara III Rudahigwa, Rwagasana Michel, Uwilingiyimana Agathe, Niyitegeka Felicite n’Abanyeshuri b’i Nyange banze kwitandukanya ubwo baterwaga n’abacengezi, mu 1997, bari mu cyiciro cy’Imena.

Perezida Kagame hamwe n'abandi banyacyubahiro nyuma yo gushyira indabo ku gicumbi cy'intwari