Abapolisi cumi na barindwi bari mu nama y’iminsi ibiri igamije kurebera hamwe ishyirwaho ry’ishami muri Polisi y’u Rwanda rishinzwe kurwanya imiti ya magendu, iy’imyiganano n’itujuje ubuziranenge.

Iyi nama iri kubera ku cyicaro cya Polisi y’u Rwanda ku Kacyiru, ikaba yatangiye kuri uyu wa 5 Mutarama 2015.

Atangiza ku mugaragaro iyi nama, Umuyobozi wa Polisi y’u Rwanda wungirije, ushinzwe ibikorwa bya Polisi, DIGP Dan Munyuza,yashimiye Ubunyamabanga bwa Polisi mpuzamahanga ku gukomeza gufasha Polisi y’u Rwanda kwiyubaka kinyamwuga.

Yongeyeho at “…Na none ndayishimira kuba yaremeye ugusaba kwacu itwoherereza impuguke kugira ngo zidufashe gushyiraho ishami ridasanzwe ryo kurwanya ibintu by’ibyiganano, bitujuje ubuziranenge ndetse n’ibya magendu”.

Ati,” Imiti ya magendu, iy’imyiganano kandi itujuhje ubuziranenge iteza ingaruka mbi ku buzima bw’abayinywa, umutekano, ndetse n’ubukungu”.

Yakomeje agira ati "Kuva mu mwaka wa 2008,u Rwanda, nka kimwe mu bihugu bigize Polisi mpuzamahanga,yagize uruhare mu bikorwa bigamije kurwanya no gufata imiti y’imyiganano, iya magendu,n’itujuje ubuziranenge ".

Muri ibyo bikorwa harimo imikwabo yiswe Fagia na Wipe-out, yakozwe mu kwezi kwa 6 n’ukwa 12, umwaka ushize, yafatiwemo imiti myinshi ya magendu kandi itujuje ubuziranenge.

DIGP Munyuza ati,"Dushingiye ku musaruro w’ibi bikorwa hamwe n’inshingano za Polisi y’u Rwanda zo kurinda abaturarwanda n’ibyabo,twasanze nka kimwe mu bihugu bigize Polisi mpuzamahanga, gifite uruhare mu mutekano ku isi, tugomba gushyiraho ishami ryihariye rirwanya imiti ya magendu, iy’imyiganano ndetse itijuje ubuziranenge, dufatanyije n’abafatanyabikorwa bacu".

Iri shami rizaba rishinzwe kurwanya ibintu byose by’ibyiganano kandi bitujuje ubuziranenge birimo imiti ivura abantu, amavuta yo kwisiga, ibyuma by’ikoranabuhanga, imiti yica udukoko, ibikoresho by’ubwubatsi, ibiribwa n’ibinyobwa.

Umwe muri izi mpuguke za Polisi mpuzamahanga,Thierry Tuina, yagize ati, " Bene iyi miti igira ingaruka mbi ku buzima bw’abayinywa, ku bidukikije, n’ubukungu. Ubu bucuruzi butemewe bukorwa ahantu hatari hake ku isi cyane cyane ku mugabane wa Afurika".

Yavuze ko iyi gahunda ikozwe ku nshuro ya mbere muri Afurika ifitiye akamaro Polisi mpuzamahanga kuko ari imwe mu ngamba zihamye zo kurwanya no gukumira ibyaha bijyanye n’imiti ya magendu, iy’imyiganano ndetse itujuje ubuziranenge.

James Kamanzi, umuyobozi wungirije w’ikigo cy’igihugu cy’ubuziranenge, yagize ati,"N’ubundi, ubufatanye mu kurwanya imiti ya magendu, itujuje ubuziranenge kandi y’imihimbano, bwari busanzweho hagati y’inzego zitandukanye ariko ishyirwaho ry’uyu umutwe bizatuma kurwanya bene ibi byaha birushaho gukorwa neza".

Umuyobozi wa Polisi mpuzamahanga muri Polisi y’u Rwanda, ACP Tony Kuramba, yagize ati "Iki gikorwa gitangijwe na Polisi y’u Rwanda.Yatumiye impuguke za Polisi mpuzamahanga kugira ngo zitwunganire mu gushyiraho ishami rya Polisi ryihariye rifite ubumenyi mu kurwanya ibyaha bijyanye no kwigana ibintu birimo imiti, ibiribwa, ibinyobwa, ibikoresho by’ubwubatsi n’amavuta yo kwisiga".

Yakanguriye abaturarwanda kunywa imiti yujuje ubuziranenge, itanzwe n’inzego zabugenewe.

Ati "Mujya mwumva inzu zaguye, zigahitana abantu, ni uko ziba zarubakishijwe ibikoresho bitujuje ubuziranenge. Mujya mwumva kandi inkongi,zimwe nazo ziterwa no kuba haba harakoreshejwe intsinga n’ibindi bikoresho bitujuje ubuziranenge.Ibi byose byangiza ibintu ndetse bikaba byahitana n’abantu".

ACP Kuramba yavuze ko u Rwanda rutaraba indiri y’ibicurizwa bitujuje ubuziranenge ariko ko ari ngombwa gufata ingamba zo gukumira ko hagira na bike byakwinjizwa mu gihugu.

Yakanguriye abaturarwanda kwumva ububi bwabyo,kutabicuruza,kutabinywa ndetse no gutanga amakuru ku gihe ku babigiramo uruhare.

Iyo nama yitabiriwe n’abafatanyabikorwa icumi ba Polisi y’u Rwanda bafite mu nshingano kurwanya imiti ya magendu, iy’imyiganano n’itujuje ubuziranenge, baturutse muri.

Minisiteri y’ubuzima, iy’ubukungu, iy’ubuhinzi, iy’ubutabera, urugaga rw’abikorera, ikigo cy’igihugu gishinzwe amasoko ya Leta ndetse n’icy’ubuziranenge.

RNP