Wari umukino w’umunsi wa Kane wa Shampiyona y’u Rwanda. Umutoza Robertinho utoza Rayon Sports yayoboye ikipe yakinnye idafite Bimenyimana Bonfils Caleb wahawe ikarita itukura.

Gusa mu bakinnyi yakoresheje yatunguranye abanza ku ntebe y’abasimbura Rutanga Eric na Yannick Mukunzi, agirira icyizere Bukuru Christopher na Eric Irambona.

Gicumbi itozwa na Hakizimana Abdul bita Bekeni yakiniraga kuri Stade ya Kigali i Nyamirambo aho iheruka gutsindirwa ibitego bine mu mukino wa shampiyona y’umwaka ushize.

Ntabwo iyi kipe yo mu Ntara y’Amajyaruguru yatangiye neza kuko yatsinzwe igitego hakiri kare, ku munota wa gatatu gusa w’umukino ku mupira wahinduwe na Iradukunda Eric winjizwa neza na Michael Sarpong bita Balloteli wakinaga umukino we wa kabiri muri shampiyona y’u Rwanda.

Gicumbi yakomeje kotswa igitutu bituma ikora amakosa menshi mu gice cya mbere, harimo nk’iryakozwe na Nsengayire Shadad rivamo ‘coup franc’ yatewe neza na Manishimwe Djabel, atsindira Rayon igitego cya kabiri ku munota wa 26.

Manishimwe Djabel wakinnye uyu mukino nyuma y’amasaha yambitse impeta umukunzi we Niyitunganye Kawthar bagiye kurushinga, yari yagoye cyane ba myugariro ba Gicumbi FC.

Gusa uyu musore w’imyaka 21 ntiyahiriwe n’uyu mukino kuko ku munota wa 41 yakoze impanuka agongana na myugariro wa Gicumbi FC, Ahishakiye Nabil, akubita umutwe hasi ata ubwenge. Hitabajwe abaganga n’imbangukiragutabara yitabwaho aza koroherwa.

Manishimwe amaze gusohoka mu kibuga yasimbujwe Yannick Mukunzi wahise agira uruhare mu gitego cya gatatu cya Rayon Sports aha umupira Niyonzima Olivier Sefu nawe wahise ahereza Sarpong atera ishoti rikomeye, Nsozera Anserme ntiyashobora kurifata.

Mu gice cya kabiri amakipe yombi yakoze impinduka; Rutanga Eric asimbura Irambona Eric na Souleyman Mudeyi asimbura Muhire Kevin.

Ku rundi ruhande Yahaya Saleh yasimbuye Willy Patrick naho Uwiringiyimana Christopher afata umwanya wa Murenzi Patrick.

Izi mpinduka ntacyo zahinduye ku mukino waje kurangira Rayon Sports ibonye intsinzi y’ibitego bitatu ku busa byatumye izamuka ku rutonde rwa shampiyona aho igeze ku mwanya wa kane n’amanota icyenda (9) irushwa atatu na APR FC iyoboye urutonde rwa shampiyona.

Uko imikino y’umunsi wa kane wa shampiyona yagenze

· Musanze FC 2-1 Espoir FC
· Amagaju FC 1-2 Police FC
· Kirehe FC 2-2 AS Muhanga
· Marines FC 0-2 APR FC SC
· Kiyovu Sports 0-1 Mukura VS
· AS Kigali 0-2 Etincelles FC
· Rayon Sports FC 3-0 Gicumbi FC
· Bugesera FC 1-1 Sunrise FC