Uyu murongo wa telefone washyizweho nk’umuyoboro wifashishwa n’abaturage, batanga amakuru yose ashoboka kuri COVID-19, ariko ibyo kuba wakoreshwa mu guhamagara abantu byo byari bitaramenyekana.

Ku mbuga nkoranyambaga haherutse gucicikana amakuru y’abantu batewe ubwoba n’uko bahamagawe n’iyo nomero ya RBC, ndetse hari n’abatinye kuyitaba bibwira ko baba baketsweho ubwandu bwa COVID-19.

RBC ivuga ko ku bufatanye n’ikigo cy’itumanaho cya MTN_Rwanda, nomero ya 0114 izajya yifashishwa mu guhamagara abantu abo ari bo bose, bakagezwaho ubutumwa bukubiye mu bukangurambaga bwo guhangana na COVID-19.

Iki kigo gisaba buri wese uzahamagarwa n’iyi nomero kudahangayika, ndetse ko akwiye kuyitaba agatega amatwi ubutumwa bwoherejwe kugeza burangiye.

Ku rukuta rwa Twitter, RBC yasabye abantu bose ko nyuma yo gutega amatwi ubu butumwa, bakwiye gukomeza gukurikiza inama bagirwa na Minisitieri y’Ubuzima muri gahunda yo guhangana na COVID-19.

U Rwanda rukomeje gushyira mu bikorwa ingamba zitandukanye zigamije gukumira ikwirakwira ry’iki cyorezo gikomeje guhangayikisha isi muri rusange.

Imibare y’abamaze kwandura COVID-19 mu Rwanda imaze kugera kuri 207, mu gihe abamaze gukira iki cyorezo bagera kuri 93.

We are happy to inform you that an outbound dialing system on #COVID19 awareness is now operational. As part of support from @MTNRwanda to RBC, you will be receiving automated calls from 0114. Don't panic, pick them up, listen till the end and apply the advice @RwandaHealth

— Rwanda Biomedical Centre (@RBCRwanda) April 28, 2020

Bamwe mu bagize itsinda rya RBC rishinzwe gutahura abahuye n'abarwayi ba coronavirus