Sosiyete Sivile ikorera mu Ntara ya Kivu y’Amajyaruguru yatangaje ko ihangayikishijwe n’ukwisuganya kw’abahoze bari mu mutwe wa M23 ikeka ko bateganya kugaba ibitero mu duce twa Rutshuru na Nyiragongo.

Mu itangazo umuvugizi wa Sosiyete Sivile muri Kivu y’Amajyaruguru, Omar Kavota, yashyize ahagaragara mu cyumweru gishize yavuze ko abahoze muri M23 batangiye kwinjiza abana bakiri bato mu gisirikare mu Karere ka Rutshuru.

Sosiyete Sivile ivuga ko Abari muri M23 bakangurira urubyiruko kwinjira mu gisirikare bakabajyana mu birindiro byabo aho bari kwitegura kongera kutangira kugaba ibitero muri Kivu y’Amajyaruguru.

Ikinyamakuru Le Phare kivuga ko mu duce twa Katale na Buvunga mu Karere ka Bwisha, abaturage bashyira mu majwi uwitwa Jean Felix Shamba wahoze yinjiza abana mu gisirikare cya M23 yatsindwa agahungira mu Rwanda ariko nyuma agasubira muri Congo anyuze i Rubavu muri Kamena 2014.

Aba baturage bavuga ko Shamba ari kwinjiza abasore mu gisirikare batazi icyo ari cyo ariko bagakeka ko ari M23 ishaka kugaruka.

Makenga Sultani wahoze ayoboye M23

Uyu mugabo ngo abwira urubyiruko rwemeye kwinjira muri M23 kugana ibirindiro bishya biri ahitwa Kichanga mu karere ka Bwito.

Sosiyete Sivile ya Kivu y’Amajyaruguru isaba ingabo za Leta ya Congo gukumira uyu mutwe amazi atararenga inkombe.

Umutwe wa M23 watsinzwe n’ingabo za Congo FARDC zifatanyije n’iza Loni ,Monusco, umuyobozi wayo Sultani Makenga ashyira intwaro hasi hamwe n’abarwanyi basaga 1500 ku wa 7 Ugushyingo 2013.