Korali Christus Regnat, yo muri Kiriziya Gatorika Paruwasi Regina PacisRemera Arkidiyosezi ya Kigali, mu Karere ka Gasabo mu mujyi wa Kigali, yateguye ibitaramo bitandukanye mu rwego rwo kwifatanya n’Abanyarwanda kwibuka ku nshuro ya 20 Jenoside yakorewe Abatutsi.

Iyi korali yateguye igitaramo gifite insanganyamatsiko igira iti “Pasika, Inkingi yo Kwibuka Twiyubaka” kizamurikirwamo album y’Amajwi ya kane bise “Nazutse”, igizwe n’indirimbo 10 za Pasika.

Abayobozi ba Korali Christus Regnat mu kiganiro n'abanyamakuru

Mu kiganiro n’abanyamakuru umwe mu bagize iyi Korali akaba ukuriye komisiyo irimo gutegura igitaramo, Ngoboka Cyriaque, yashimangiye insanganyamatsiko yemeza ko bagiteguye mu rwego rwo kwifatanya n’Abanyarwanda kwibuka ku nshuro ya 20 Jenoside yakorewe Abatutsi muri Mata 1994.

Ngoboka yagize ati “Turashaka gufasha abantu gutambuka bava muri bwa bucakara bwa Jenoside, tukazamuka turangamira icyizere cy’ejo hazaza.
Yongeyeho ati “Turashaka gufasha abantu, kongera kubasana imitima dukoresheje indirimbo zibafasha kwegera Imana, bakava muri rya curaburindi bari barimo noneho bakarangamira Kristo, we wazutse akanesha urupfu”.

Ngoboka yakomeje avuga ko uretse indirimbo z’umwimerere z’iyi korali n’izindi zizaririmbwa, iki gitaramo kizaba kirimo n’ibiganiro bitandukanye.

Yagize ati ”Hazaba harimo ikiganiro ku kwibuka, ku muziki n’ikiganiro ku izuka, bizatangwa n’abantu batandukanye babifitemo ubumenyi”.

Korali Christus Regnat ya Paruwasi ya Remera

Iki gitaramo gitegerejwe tariki 25 Gicurasi 2014, kikazabera muri Hotel Serena i Kigali, guhera saa kumi n’ebyiri z’ umugoroba,kwinjira ni ubuntu.

Bivugwa ko kikazakurikirwa n’ibindi bitaramo bizabera hirya no hino mu gihugu, bigamije kumenyekanisha indirimbo z’iyi korali.

Korali Christus Regnat yashinzwe mu mpera z’umwaka wa 2005 igamije, gusingiza Imana no gufasha abakiristu gusenga babifashijwemo n’indirimbo mu gikorwa rusange(Liturgie) cya Misa ntagatifu, no gususurutsa abantu hakoreshejwe indirimbo mu yindi mihango ihesha Imana icyubahiro yemewe muri Kiliziya Gatolika Ntagatifu.

Iyi Korali igizwe n’abanyamuryango begeze ku ijana, harimo abagera kuri 60 baboneka ku buryo buhoraho, ifite kandi abanyamuryango b’icyubahiro bayiba hafi bakayifasha mu bikorwa bitandukanye.

Mu kiganiro n'abanyamakuru

[email protected]