Ku itariki 25 Gashyantare 2020 nibwo hatangiye gukwirakwira amashusho yafashwe na Camera zicunga umutekano, agaragaza umukobwa wambaye umwambaro w’akazi uranga aba-agent ba MTN, akubitwa n’abasore babiri mu buryo bukomeye, bamwambura amafaranga yari afite.

Ayo mashusho bigaragara ko yafashwe ku itariki ya 23 Gashyantare 2020 ahagana saa 17:20 agaragaza ko abasore babiri bayoboye uwo mukobwa ahantu hatari abantu babigambiriye cyangwa bakamutegera ahantu yari agiye kwinjira, ariko batazi ko hari Camera zicunga umutekano.

Umusore umwe yaramufashe aramuniga, undi atangira kumukubita amusaka, amwambura ibyo afite bigaragara ko ashakamo amafaranga kugeza ubwo bamusize aho ari intere.

MTN Rwanda yatangaje ko uwo mukobwa witwa, Jeannette Tuyisenge, yamusuye aho arwariye kandi ko ari kwitabwaho n’abaganga. Iyo sosiyete y’itumanaho yashimiye abagaragaje icyo kibazo itangaza ko RIB yatangiye kugikurikirana kandi ko kizagezwa inzego zibishinzwe.

Ubutumwa yanyujije kuri twitter bugira buti “Mwakoze mwese ubutumwa bwanyu twabwakiriye mu izina ry’umwe mu bacuruzi bacu ba Mobile Money Jeannette Tuyisenge wakubiswe bikomeye akanibwa. Ubuyobozi bwamusuye, abaganga bakomeje kwita ku bikomere bye. RIB nayo iri gukora iperereza, ibijyanye n'iki kibazo biraza kugezwa ku nzego zose bireba.”

Abantu batandukanye bagaragaje ko bababajwe n’iryo hohoterwa, bagendeye kuri ayo mashusho yakomeje guhererekanwa ku mbuga nkoranyambaga cyakora bagaragaza ko kuba ayo mashusho yagaragaye ari ukuba hari camera zicunga umutekano bityo ko zigiye henshi hashoboka byafasha.