Umuganda wakorewe ku Ishuri Ribanza rya Busigari, ni uwo kongera ibyumba by’amashuri.

Ubuyobozi bwa I&M Bank, buvuga ko uyu muganda ndetse n’ubwisungane mu kwivuza batanze biri muri gahunda bafite yo kunganira Leta mu guteza imbere imibereho myiza y’abaturage.

Umuyobozi wungirije w’ishami rishinzwe abakozi muri I&M Bank, Ruhumuriza Jean Marie Vianney, yasobanuye ko impamvu batanze mituweli ari uko ubuzima bwiza ari yo nkingi y’iterambere.

Ati “Nkuko leta idukangurira kwishakamo igisubizo kandi ubuzima ni ikintu gikomeye budahari ntitwakora umuganda nk’uyu na Banki yacu ntiyakora nta buzima niyo mpamvu dukora ibikorwa birimo gufasha abaturage bakennye akaba ari nayo mpamvu turi hano tubazaniye Mituweli 1000, kuko nubwo turi abacuruzi, dukora ibikorwa by’iterambere’’.

Icyimanizanye Alphonsine, wavuze mu izina ry’imiryango yahawe ubwisungane mu kwivuza, yashimye abakozi b’iki kigo cy’imari umutima w’urukundo babagaragarije.

Ati “Ndashimira abakozi biyi Banki ya I&M Bank, umutima w’urukundo, kuba bakoze urugendo baje kudufasha kubaka ishuri no kuba baduhaye Mituweli ni urukundo rudasanzwe, tubasabiye imigisha ku Mana kuko ubu hari imiryango itazarembera mu rugo’’.

Umuyobozi w’Akarere ka Rubavu wungirije ushinzwe iterambere ry’ubukungu Murenzi Janvier, yashimye iyi Banki asaba abaturage kwishakamo ibisubizo.

Ati “Ndashima I&M Bank kuko si ubwa mbere badufashije bakaba bishyuye Mituweli 1000, amafaranga bayaduhaye abari ku rutonde n’ubu uwarwara yakwivuza. Ibi ni uburyo bwo gukorera hamwe, namwe rero ndabasaba ko mwakomeza guharanira kwishakamo ibisubizo kuko niyo nzira yo kwiteza imbere’’.

I&M Bank yaherukaga gutanga Mituweli ku miryango itishoboye mu turere twa Musanze na Huye.

Abakozi ba I&M Bank babanje gukorana umuganda n'abaturage wo kubaka icyumba cy'amashuri

Umuyobozi w'Akarere ka Rubavu wungirije, Murenzi Janvier akora umuganda

Icyimanizanye Alphonsine yishimiye cyane inkunga ya I&M Bank

Umuyobozi wungirije w’ishami rishinzwe abakozi muri I&M Bank, Ruhumuriza Jean Marie Vianney avuga ko ubuzima ari inkingi ya byose

Visi Meya, Murenzi yasabye abaturage guharanira kwigira