Umushinga SNV wahuguye urubyiruko rw’abakorerabushake bo mu turere twa Rulindo na Gakenke, mu bijyanye no gufata amajwi abahinzi ba Kawa bakageza ibibazo n’ibyifuzo byabo ku nzego zibishinzwe .

Aba bakorerabushake bagera kuri 17 baturutse muri buri kagari gahinga Kawa kurusha utundi tugari muri buri murenge ugize uturere utwo turere, bazajya bifashisha telephonezigezweho ‘smartpshones” bafate amajwi abahinzi babasanze mu murima wa Kawa, yoherezwe ku nzego zibishinzwe kugirango ibibazo byabo bibonerwe ibisubizo.

Ranjan Shrestha uyoboye ishami ry’ubuhinzi rya SNV yavuze ko uyu mushinga ufite intego zo kuzamura abahinzi ba Kawa bato bakagera ku rugero rufatika babifashijwemo n’izindi nzego..

Yagize ati “ Kugirango tugere kuri iyo ntego twihaye, bidusaba gukorana n’inzego zitandukanye zirimo abikorera, inzego za Leta hamwe n’abakorerabushake.”

Akomeza avuga ko aya majwi y’abahinzi, azajya ashingirwaho mu gufata ibyemezo mu rwego wo kumenya kurushaho imbogamizi abahinzi bahura nazo no guteza imbere igihigwa cya Kawa mu Rwanda.

Ushinzwe ubuhinzi mu karere Gakenke, Deny Hagenimana yavuze ko iyi gahunda ije yunganira izari zisazwe, hari byinshi izakemura.

Yagize ati “ N’ubwo iyi gahunda tutarayisobanukirwa neza, turabona ko izagira akamaro gakomeye kandi ikazadufasha kugira amakuru nyayo avuye ku bahinzi. Ubusanzwe twagiraga amakuru avuye mu makoperative, tukagira amakuru avuye ku rwego rw’umurenge… ariko ayo makuru nitubasha kuyahuza bizadufasha kugera kumwanzuro mwiza.”

Mutuyimana Jeannette , uhagarariye abafatanyabikorwa b’akarere ka Rulindo yasabye abakorerabushake kuzakorana umurava n’ubwitange kugirango intego z’uyu mushinga zizabashe kugerwaho.

Umushinga SNV ukorera mu bihugu 137 ku Isi , watangiye gukorera mu Rwanda mu mwaka 1980, ibiro bikuru byawo biri mu Buholandi. Ukaba ifite intego yo guteza imbere abahinzi ba Kawa baciriritse hamwe n’aborozi b’Inka n’Inzuki.

[email protected]