Bamwe mu batuye mu murenge wa Burega mu karere ka Rulindo , bahangayikishijwe n’ikibazo cy’ubutaka bworoshye, butuma imisarane iriduka.

Aba baturage batangarije IGIHE ko mu igihe cy’imvura birinda kujya kwituma mu musarane kuko baba bikanga ko ubaridukana. Bituma bashaka ahandi bituma hatari mu musarane, nubwo babyita amaburakindi .

Bazambanza Jean utuye mu kagari ka Taba avuga ko atazi umubare w’imisarane ye imaze gutenguka.

Yagize ati “ Iyo igihe cy’itumba kigeze tuba twiteguye ko umusarane ugiye guhita uriduka, ubwo nyine nawe urabyumva mu gihe cy’imvura ntawituma mu musarane nugushaka ahandi umuntu yikinga, kuko uba wikanga ko ushobora kukuridukiraho.”

Barayubaka igahita iriduka

Abandi baturage nabo bavuga ko bikanga kuridukanwa n’imisarane bakajya kwituma ku gasozi .

Umwe ati “ Ujya kwituma mu bihuru cyangwa mu murima ukahataba . Ubwo se wakwemera ko umusarane ukuridukana?”
Undi ati “ Kwituma ku gasozi ndabiziko ari umwanda ariko nta kundi nabigenza. Tujya kwituma ku gasozi .”

Umunyamabanga Nshingwabikorwa w’Umurenge wa Burega, Mutuyezu Emillie, yatangarije IGIHE ko iki kibazo cy’imisarane itenguka cyafatiwe ingamba.

Yagize ati “ Icyo ni ikibazo gikomeye, kuko muri cya gihe imvura iba irimo kugwa imisarane y’abaturage irariduka. Umurenge wa Burega ni agace k’imisozi ihanamye kandi ubutaka bwaho buroroshye cyane. Iyo rero niyo mpamvu y’uko kuriduka kw’imisarane.”

Iyo bubatse imisarane ntimara kabiri\

Akomeza avuga ko imisarane iriduka nta muturage irahitana, ariko nanone ko nabyo byashoboka, akaba ariyo mpamvu hafashwe ingamba zo gushishikariza abaturage bukoresha imisarane igezweho yo mu bwoko bwa ECOSAN.

Ati “ Igiciro cy’iyo misarane kiri hejuru , ariko twasanze ariyo yaba igisubizo cy’icyo kibazo. Umusarane 1 uhagaze hagati y’amafaranga ibihumbi 60 na 70 , kugirango bizagerweho turateganya kuzafatanya n’abafatanyabikorwa, no gukangurira abaturage kwibumbira mu matsinda .”

Mutuyeyezu akomeza avuga ko iki kibazo kiragara cyane mu duce turi mu mabanga y’imisozi .

Mu kagari ka Taba mu mudugudu wa Kinzuzi, uwa Gasango hamwe n’umudugudu wa Bugarama ni hamwe mu hari ikibazo cy’imisarane itenguka.

Iki kibazo kandi kiri mu kagari ka Karengeri mu midugudu ya Kizenga Mitabi na Gasare.