Nzeyimana Oscar wahoze ari umuyobozi w’Akarere ka Rusizi n’abo bafunganywe bakatiwe gufungwa iminsi 30 y’agateganyo, Gitifu w’Umurenge wa Bugarama na we abasanga mu muri gereza.

Urukiko rwisumbuye rwa Rusizi rwafashe umwanzuro w’uko bagomba gufungwa iminsi 30 y’agateganyo nyuma y’uko rusanze ibyaha bakekwaho bikomeye bikaba bishobora gutuma bafungwa igihe kirekire, ku buryo Barekuwe bashobora gutoroka ubutabera.

Abakatiwe iyi minsi 30 y’igifungo ni Nzeyimana Oscar wahoze ari umuyobozi w’aka karere ka Rusizi na Bayihiki Basil wari ushinzwe imibereho myiza y’abaturage, bombi bakaba baranamaze kwegura, mu gihe Muhawenima Juliette Ushinzwe ubukangurambaga bwa mituweli muri ako Karere we yarekuwe ngo ajye aburana ari hanze kubera ko atwite.

Abandi bakatiwe gufungwa by’agateganyo ni Ndamuzeye Emmanuel Ushinzwe ubuzima mu karere, Baginama Athanase ushinzwe ubwisungane mu kwivuza, Nzayituriki Theoneste ushinzwe mituweli mu bitaro bya Gihundwe, na Maniragaba Dieudone wari ushinzwe Mituweli mu kigo nderabuzima cya Mashesha.

Gitifu w’umurenge wa Bugarama na we yabasanze mu buroko
Umunyamabanga Nshingwabikorwa w’Umurenge wa Bugarama Nduwayo Viateur yafashwe na polisi ku wa gatanu tariki ya 16 Mutarama 2015, aho akurikiranyweho ibijyanye no kunyereza amafaranga yagombaga guhabwa abaturage mu mirimo ya gahunda y’icyerekezo 2020 mu Murenge (VUP).

Aya mafaranga ngo yanyerejwe mu murenge wa Nyakarenzo Nduwayo yahoze ayobora.

Mu ntara y’Iburenegerazuba, batatu bari abayobozi b’Uturere bamaze kwegura, bakaba banafunze mu gihe hari n’abandi bari munsi ya bo na bo bafunze.

Akarere ka Rusizi na Nyamasheke buri kamwe kabarurwamo miliyoni 700 zaburiwe irengero mu mafaranga y’ubwisungane mu kwivuza.

[email protected]