Iki gikorwa benshi bafashe nk’icyo gupfobya jenoside kikaba cyarabaye ejo hashize tariki 7 Mata ubwo Abanyarwanda batangiraga kwibuka ku nshuro ya 21 Jenoside yakorewe Abatutsi, aho abantu barenga miliyoni imwe bishwe mu minsi 100 gusa.

Mu kiganiro kigufi kuri telefoni Umuvugizi wa Polisi y’u Rwanda CSP Celestin Twahirwa yatangarije IGIHE, ko uwo muturage warokotse jenoside koko yatwikiwe ikiraro ku munsi wa mbere wo kwibuka.

CSP Twahirwa yagize ati "Ni byo koko bamutwikiye ikiraro mu gitondo igihe yari yagiye mu muhango wo kwibuka, kuko akigerayo ni bwo bahise bamutabaza bamubwira ko kiri gushya”.

Yakomeje avuga ko iperereza riri gukorwa dore ko nta makuru arambuye Polisi ifite uretse ko ikeka ko ubu bugizi bwa nabi bwakozwe na bamwe mu batari bitabiriye igikorwa cyo kwibuka kuri uyu munsi.

Polisi ishimangira ko nta bintu byangiritse cyane kuko abaturage bahise batabara bazimya uwo muriro ndetse, inongera kwibutsa Abanyarwanda ko umutekano cyane cyane muri ibi bihe utareba abarokotse Jenoside gusa, ahubwo buri wese agomba kuba ijisho rya mugenzi we no kugira n’uruhare mu kurinda umutekano.