Mu myaka 20 amaze ari umudozi, amaze kuba icyamamare mu Karere akoreramo kuko uretse abanyarwanda benshi bamugana n’abanyamahanga batandukanye arabadodera kandi bagataha banyuzwe.

Mu nzozi ze,akurikije ubumenyi,ubunararibonye n’impano afite mu budozi, Musabyimana yumva azatuza ari uko adodeye ishati Umukuru w’Igihugu, Paul Kagame.

Ati “Nkurikije ubumenyi,ubunararibonye n’impano mfite muri uyu mwuga, ndifuza ko nabona amahirwe byibuze nkadodera Nyakubahwa Paul Kagame, ishati imwe kuko mbona zimubera kandi anazikunda.Ibi bishobotse byaba ari no kumwereka ibyo twagezeho mu kwitabira imyuga nkuko ahora abidukangurira. Umunsi nabonye yambaye ishati nadoze, bizanshimisha kandi hari icyo bizasobanura ku bakora umwuga w’ubudozi mu Rwanda.”

Avuga ko yadodeye abaturutse mu bihugu bitandukanye birimo ibituranye n’u Rwanda ndetse n’abaturutse muri Amerika n’u Burayi.

Musabyimana wahize kuzadoda ishati y'umukuru w'igihugu

Musabyimana ni umwe mu bagize igitekerezo cyo gutangiza koperative y’ubudozi yitwa “Ambaruberwe Nawe” ikorera i Rusizi, ikunze kwegukana ibikombe ku rwego rw’igihugu no ku rwa Afurika mu bijyanye n’ubudozi.

Amaze kugera kuri byinshi akesha umwuga we birimo inzu n’ibikoresho bitandukanye bimufasha mu kazi ke.