Kuwa Kane, tariki ya 9 Gicurasi 2013, mu turere twa Rwamagana na Kayonza hasojwe urugendo-shuri rwakorerwaga mu midugudu y’ikitegererezo ya Kitazigurwa na Nyagatovu. Uru rugendo-shuri rwakozwe mu rwego rwo kureba aho abandi bageze bashyira mu bikorwa gahunda y’imiturire ifite icyerekezo aho biteganyijweko mu mwaka wa 2017 buri murenge uzaba ufite umudugudu w’ikitegererezo.

Nkuko bigenda bigaragazwa n’uwari uyoboye iki gikorwa Nkusi Mugabo Emmanuel, umukozi ushinzwe ubukangurambaga bw’imiturire y’icyaro muri Minisiteri y’Ubutegetsi bw’Igihugu (MINALOC); gutura mu midugudu itunganye kandi yujuje ibyangomba ni kimwe mubyakwihutisha iterambere. Asanga kandi ibi bizagerwaho igihe cyose inzego zitandukanye zihagurutse zigafatana urunana maze zigashyira ingufu mu kwita ku miturire ifite icyerekezo, kandi ishingiye ku nkingi cumi n’imwe z’iterambere (IDP Pillars).

Uru rugendo-shuri rwakozwe rwitezweho kuzihutisha gutunganya imidugudu y’ikitegererezo yatangiye kubakwa mu turere twose, hakaba hanateganywa ko muri 2017 buri murenge wazaba ufite umudugudu utuganyije neza.

Mubaturage twaganiriye, uwitwa Nyirambarushima w’imyaka 54 ashima ibyiza byo kuba mu mudugudu kuko avuga ko yahaboneye byinshi mbere atari yarabashije kugeraho, ibyo ni Biogaz, amashanyarazi, amazi meza ndetse n’akarima k’igikoni. Undi witwa Murekatete Solange w’imyaka 38, nawe yishimira cyane kuba yarakuwe mukazu ka kagonyi (kendaga gusenyuka) ubu akaba yarahawe inzu igaragara ifite agaciro kari hafi miliyoni esheshatu.

Nkusi kandi avugako imiturire igomba kurenga kubona icumbi bikagera aho umusaruro wiyongera hahuzwa ubutaka, abaturage bagakora imirimo inyuranye idashingiye k’ubuhinzi n’ubworozi gusa, ahubwo bakoresha n’ikoranabuhanga, ndetse bakabyaza n’amashanyarazi umusaruro.

Uretse kuba uru rugendo shuri rwararebaga kubijyanye n’imiturire, rwanagarutse kukureba uko hakorwa ubukangurambaga kukuva kubakisha amabati, abantu bitabira kubakisha amategura, aho hagiye hagaragazwa ibyiza ndetse n’imbogamizi kugukoresha ibyo byombi.

Mubyagaragajwe kumyubakire ikoresheje amabati, ni uko bihenze cyane, ibati rikaba rikorerwa hanze y’igihugu kandi rikaba rishyuha ndetse no mu burambe bikagaragara ko risaza vuba. Nyamara ikoreshwa ry’itegura hagarahajwe ko rifite inyungu nyinshi aho byagaragajwe ko rikorwa n’abanyarwanda kandi mu bikoresho byo mu Rwanda buri muturage wese yabasha kubona, ikindi ritanga akazi k’urubyiruko, ntirishyuha kandi riramba.

Mu bindi byiza byagaragajwe kugutura mu midugudu, ni uko ibikorwaremezo bigezwa kubawutuyemo muburyo bworoshye ndetse no gukorera ubukangurambaga abawutuye bikaba byoroha cyane.

Bamwe bari batuye muri bene izi nzu