Ku mugoroba wo ku wa 15 Nzeri nibwo hatangijwe Rwanda Film Festival, ibirori byabereye i Nyarutarama bikitabirwa n’abantu b’ingeri zitandukanye barimo abanditsi, abakinnyi n’abatunganya filime n’abayobozi.
Ku ikubitiro herekanywe Filime ngufi yitwa ‘Lulu’, ivuga ku buzima bw’umukobwa wo muri Tanzania watangiye gukina Box adashyigikiwe n’umuryango, ariko ubu bikaba bimutunze aho abifatanya no gucuruza imbuto.
Hanerekanywe kandi iyitwa ‘Karani Ngufu’ yakozwe n’abanyeshuri bahuguwe binyuze mu mushinga witwa Rwanda Media Project, barangajwe imbere na Joseph Njata.
‘Karani Ngufu’ igaragaza ishusho y’ubuzima abana b’abakobwa bakora akazi ko mu rugo babamo, aho batotezwa ndetse akenshi ba nyirabuja ntibashime ibyo baba bakoze.
Umuyobozi wa Kwetu Film Institute itegura Rwanda film festival, Eric Kabera, yavuze ko mu gihe iri serukiramuco riri kuba ku nshuro ya 14 bishimira ko Abanyarwanda barushaho kugenda basobanukirwa akamaro ka sinema.
Ati “Hari byinshi byagezweho, natangiye ari njye gusa ukora filime ariko ubu tumaze kuba benshi. Ikindi ntabwo tukigenda dusunika, ubonye ukuntu leta igenda ishyira imbaraga mu guteza imbere ubuhanzi ubona ko bigenda bitera imbere.”
Hanerekanywe kandi iyitwa ‘Love Jacked’, yayobowe n’umunya-Canada, Alfons Adetuyi. Igaruka ku nkuru y’umukobwa witwa Maya, umunyabugeni ujya kuruhukira muri Afurika ashakisha inganzo ariko agasubira iwabo ajyanye n’umusore bitegura ku rushinga.
Biteganyijwe ko Rwanda Film Festival izasozwa ku wa 21 Nzeri 2018. Mu gihe cy’icyumweru izamara hakazerekanwa filime mu bice bitandukanye by’igihugu birimo Rubavu, Karongi no mu mujyi wa Kigali.
Ibitekerezo 0