Mu kiganiro n’abanyamakuru cyo kuri uyu wa Gatatu tariki 21 Ukuboza 2016, Umuyobozi ushinzwe ibikorwa byo kwegera abaturage muri SFH-Rwanda, Kwizera Bosco, yavuze ko mu Rwanda hose ubariyemo n’utundi dukingirizo dutangwa n’ibigo nderabuzima n’abandi bafatanyabikorwa, tugera kuri miliyoni 25 ku mwaka.

Kwizera yakomeje avuga ko udukingirizo twagejejwe ku badukeneye binyuze mu bacuruzi ba butiki n’amashyirahamwe y’abakora umwuga w’uburaya. Yavuze ko intambwe imaze guterwa ari ndende ariko hakiri icyuho kinini kuko imibare y’ubwandu bushya ikiri minini.

Yagize ati “Haracyari imbogamizi kuko hari abantu batagakoresha. Ni ugukomeza ubukangurambaga kugira ngo tuzagere ku ntego twiyemeje y’uko mu 2018 ubwandu bushya buzagabanuka bukava ku bihumbi bitandatu bukagera kuri bibiri.”

Muri uku kwezi kw’Ukuboza gusa SFH imaze kugurisha udukingirizo miliyoni 1.5 tuvuye ku bihumbi 500 twacurujwe mu Ugushyingo 2016.

SFH-Rwanda kandi yasabye Abanyarwanda gukomeza kwitwararika muri iyi minsi mikuru bakifata, byananirana bagakoresha udukingirizo, bityo bakaba abayobozi b’ubuzima bwabo.

Imibare y’ishami ry’Umuryango w’Abibumbye ryita ku buzima, OMS, igaragaza ko miliyoni 78 ku Isi yose zifite virusi itera Sida na ho miliyoni 35 zikaba zimaze kwicwa nayo kuva yamenyekana.