Kuri uyu wa kane tariki ya 28 Gicurasi, Abagize imiryango ya sosiyete sivile y’u Rwanda bahuriye mu nama yo guhuriza hamwe ibitekerezo, hagamijwe gusangira ubunararibonye no gutora abayobozi bazahagararira iyi miryango mu ihuriro rya sosiyete sivile ya ICGLR.

Zimwe mu nshingano za Sosiyete sivile y’akarere k’ibiyaga bigari, ni ukugenzura imikoranire y’imiryango ya sosiyete sivile ku rwego rw’ibihugu no gukorana na yo hagamijwe gushyikiriza ibitekerezo abaturage batanga, ngo bigezwe ku nama y’abakuru b’ibihugu ba ICGLR iba buri mwaka.

Iyi Sosiyete sivile izafasha imiryango ihagarariye inzego zitandukanye gutanga ibibazo n’ibitekerezo byayo bigezwe ku nama ya ICGLR, inasuzume amasezerano yasinywe muri buri rwego uko yubahirizwa.

Joseph Butiku ukomoka muri Tanzania akaba ariwe uyoboye sosiyete sivile y’akarere k’ibiyaga bigari, yavuze ko iri huriro rigamije guharanira amahame ya Demokarasi n’imiyoborere myiza kandi buri wese yubahiriza amategeko n’amasezerano ibihugu byasinye, nk’umuti w’amakimbirane n’intambara ziri mu karere.

Yagize ati’’ Nka sosiyete sivile ya ICGRL, tuzaharanira demokarasi n’imiyoborere myiza. Buri wese agomba kubaha amategeko y’igihugu n’ibyo itegeko nshinga riteganya, tugomba kubaha no gukurikiza amasezerano y’imiryango itandukanye twasinye, ibi nitubikora, tuzaba turangije amakimbirane n’intambara zose ziri mu karere.’’

Umwe mu bitabiriye iyi nama Eric Mahoro waturutse mu muryango w’urubyiruko Never Again Rwanda, yavuze ko iri huriro rizakemura bimwe mu bibazo byagaragazwaga n’imwe mu miryango ya sosiyete sivile, biturutse ku bumenyi bwo gusesengura amategeko na Politiki z’ibihugu.

Yagize ati’’ Iri huriro ni urwego rwo gutizanya ingufu kugirango ijwi ryacu rigere kure.’’

Umuyobozi wa Sosiyete sivile y’u Rwanda Munyamariza Eduard, yavuze ko iri huriro ritarajyaho habaga nk’intambara hagati y’ibihugu, sosiyete sivile zabyo zikananirwa kuganira kuko habagaho kwishishanya bamwe bagatekereza ko leta zabo zabafata nk’ibyitso.

Umuyobozi wa Sosiyete sivile y’u Rwanda Munyamariza Eduard

Yongeyeho ko kuba mu ihuriro bizabafasha kuvugira hamwe no gusaba abayobozi b’ibihugu kubaha amahame ya demokarasi nk’umusingi wo kugarura amahoro no gukemura ibibazo by’abaturage mu akrere.

Yagize ati’’ Tuzazamurira ijwi rimwe dusabe abakuru b’ibihugu kubaha amahame ya demokarasi n’ibigize amategekonshinga y’ibihugu bayoboye kugirango amahoro n’umutekano byimakazwe.’’

Iri huriro ry’amasosiyete sivile ya ICGLR ryemejwe n’amasezerano yashyiriweho umukono i Bujumbura muri Nyakanga 2011.

Sosiyete sivile yo mu Rwanda yabayeho mu mwaka wa 2006, ikaba ikora ibikorwa byo kuvugira abaturage, hagamijwe guharanira demokarasi na Politiki z’iterambere.