Sosiyete Sivile Nyarwanda iranengwa kudakurikirana uko abaturage bakwa n’uko batanga umusoro

Yanditswe na Evariste Nsengimana
Kuya 5 Gashyantare 2019 saa 05:31
Yasuwe :
0 0

Sosiyete Sivile Nyarwanda iratungwa agatoki ko idakangurira abaturage gutanga umusoro cyangwa ngo ikurikirane imenye niba basoreshwa uko amategeko abiteganya.

Ikigo mpuzamahanga gikora ubushakashatsi ku misoro n’iterambere (ICTD), gitangaza ko uruhare rw’imiryango itari iya leta mu gukangurira abaturage gusora no gukurikirana uko basora bikiri hasi.

Umuyobozi mukuru wa ICTD, Mick Moore, yavuze ko umusoro utangwa n’abaturage ari ingirakamaro ku iterambere ry’igihugu, ariko baba bagomba kumenyeshwa akamaro kawo kandi ntube ubakandamiza.

Yabitangaje i Kigali kuri uyu wa kabiri, ubwo hatangizwaga inama mpuzamahanga igamije kureba uruhare rw’umusoro mu iterambere ry’ibihugu bya Afurika, ihuje impuguke n’abashakashatsi ku misoro 120 baturutse mu bihugu 26 byo ku isi.

Moore yavuze ko hakwiye kubaho amasezerano hagati y’ibigo by’imisoro na Sosiyete sivile, akubiyemo uburyo bazafatanya mu gukangurira abaturage gusora kandi mu buryo butabakandamiza.

Komiseri Mukuru w’ikigo cy’imisoro n’amahoro mu Rwanda (RRA), Ruganintwali Pascal, yavuze ko ubusanzwe sosiyete sivile iba ikwiye gukangurira abaturage gusora, ikanakurikirana niba basora mu buryo butabakandamiza.

Ruganintwali yavuze ko nta bikorwa bifatika Sosiyete sivile nyarwana irakora, bigamije gukangurira abaturage gutanga umusoro cyangwa gukurikirana niba umusoro bakwa utabakandamiza.

Ati “Ntabwo turabona uruhare rufatika rwa Sosiyete sivile mu gukangurira abasora gusora, ubona akenshi RRA isa n’aho yirwanaho.”

Yavuze ko uretse nk’itangazamakuru n’inzego za Leta zibikora kuko biri mu nshingano zazo, ubundi RRA yirwanaho mu gukangurira abaturage gutanga umusoro.

Ati “Twibwira ko mu by’ukuri aho igihe kigeze bagomba no gufata iya mbere nk’uko bagenzura ibikorwa byacu, turumva bakwiye kureba uburyo barushaho no kumenyekanisha uruhare rw’umusoro mu iterambere ry’igihugu.”

Mu kiganiro umuyobozi wa Sosiyete Sivile Nyarwanda, Sekanyange Jean Léonard, yagiranye na IGIHE, yavuze ko ‘Bagira uruhare mu gukangurira abaturage gushyira mu bikorwa gahunda zitandukanye zibareba zirimo no gutanga umusoro’.

Ati “Birashoboka ko abantu batabimenya cyane kuko akenshi usanga gutanga umusoro bisa n’aho bishyirwa mu nzego z’ibanze na RRA, ariko natwe twinjiramo nk’abantu bibutsa abaturage inshingano zabo. Turabikora nubwo bitagaragarira benshi.”

Sekanyange yavuze ko hari imbogamizi z’uko mu gutegura no gushyiraho umusoro runaka, RRA itajya iha umwanya Sosiyete sivile ngo isesengure niba atari umutwaro ku baturage, kuko iyo wamaze gushyirwaho bigorana gukora ubuvugizi.

Yatanze urugero ku misoro yeguriwe inzego z’ibanze, irimo uw’ubutaka n’inzu ko bafashe iya mbere itegeko ryawo rimaze gusohoka, bakagaragariza RRA imbogamizi bifite ariko imbogamizi zikaba ko washyizweho impande zombi zitabiganiriye.

Iyi nama inagamije kureba uko ibihugu byarushaho kubona ingengo y’imari bikenera bidateze amaboko amahanga.

U Rwanda rugaragaza ko kwihaza ku ngengo y’imari, umwaka ushize ibyavuye imbere mu gihugu birenga 50% ndetse rufite intego ko uyu mwaka bizagera kuri 68%.

Komiseri Mukuru w’ikigo cy’imisoro n’amahoro mu Rwanda, Ruganintwali Pascal, yavuze ko ubusanzwe sosiyete sivile iba ikwiye gukangurira abaturage gusora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza