Perezida wa Sudani y’Epfo Salva Kiir yamaze gusubiza umushinga w’Itegeko ry’Umutekano mu Nteko Ishinga Amategeko ngo wongere ukorerwe ubugororangingo unonosorwe neza, nyuma y’uko inzobere mu mategeko zimugaragarije ko zimwe mu ngingo z’iri tegeko zitanoze neza.

Inkuru ya Voice of America, ivuga ko umuvugizi mu biro bya Perezida Ateny Wek Ateny, yatangaje ko Inteko Ishinga Amategeko igomba kongera ikicara ikaganira kuri iri tegeko mu buryo bunoze.

Yagize ati "Ubu Inteko Ishinga Amategeko, ni umwanya wayo ngo yongere irebe muri iri tegeko, bakongera bakariganiraho bundi bushyashya... bita cyane ku byo perezida abona ko bikwiye gukosorwa.”

Uyu mushinga w’itegeko wasubjwe mu biganza by’abadepite, Perezida Salva Kiir amaze hafi ukwezi yigana n’inzobere mu mategeko uyu mushinga w’Itegeko yakiriye ku ya 21 Ugushyingo 2014.

Uyu mushinga ubwo watorwaga, wabanje guteza impagaragara ndetse bamwe barivumbura basohoka mu Ngoro y’Inteko kubera ingingo zimwe na zimwe batumvikanagaho.

Imiryango mpuzamahanga n’impuguke, zari zaburiye Perezida Kiir ngo kureka gusinya iri tegeko, kuko riha inzego z’umutekano ububasha buhebuje, burimo nko gufata nta ruhusa umuntu wese ukekwaho ibikorwa bibi.

Abashinzwe uburenganzira bwa muntu, bari bavuze ko uwo mushinga w’itegeko unyuranye n’amategeko mpuzamahanga, abandi bakavuga ko unahabanye n’itegeko nshinga ry’inzibacyuho rya Sudani y’Epfo.