Ni muri urwo rwego inzobere mu mibanire y’abashakanye n’abantu muri rusange, Hubert Sugira Hategekimana yagendeye kuri iki gitekerezo, ategura umwanya wo guhuza abagize ababyeyi n’abandi bagize umuryango muri Kigali bakagira umwanya wo kuganira no kungurana ibitekerezo ku byabafasha gukomeza kubaka umuryango nyarwanda.

Iyi gahunda iteganyijwe ku mugoroba wa tariki 14 Ukuboza 2023 muri Park Inn Hotel ya yise Kigali Family Night itandukanye n’uko umugoroba w’ababyeyi ukorwa ahandi dore ko we yongereyemo ubusabane buhuza aba babyeyi n’abandi batarashaka, aho bahura bakungurana ibitekerezo ku ngingo runaka ndetse banafashwa kwidagadura.

Hubert Sugira avuga ko iyi gahunda izajya iba buri kwezi , yayitekereje nyuma yo gusanga kenshi na kenshi abantu batagira umwanya wo kuganira ku bibazo byibasiye imiryango nyamara bigira ingaruka mbi kubana na sosiyete muri rusange.

Ati “Ni igikorwa cyo kugira ngo abantu bagire ahantu heza bahurira baganira ku muryango, bungurane ibitekereza ku cyabafasha mu iterambere ry’umuryango. Ni umugoroba wo gusobanukirwa. Hazaba harimo gusabana, guhura n’abantu , tuzagira igihe cyo gutanga ubuhamya.”

“Ni igitekerezo twagize nyuma yo kureba ku bibazo duhura nabyo mu Miryango imwe n’imwe itajya igira umwanya wo kubiganiraho. Hari bimwe muri ibyo bigira ingaruka mbi ku bana nko gutwara inda bakiri bato, ubusinzi , ibiyobyabwenge n’ibindi byinshi.”

Mu rwego rwo kungurana ubumenyi hari ibiganiro byateguwe bizatangwa n’ababyeyi batandukanye cyangwa abandi bafite ubunararibonye ku muryango.

Kuri iyi nshuro abazatanga ibiganiro barimo Dr Muyombo Thomas [Tom Close], Ngarambe François-Xavier n’umugore we Kagoyire Yvonne Solange, Pasiteri Hortense Mazimpaka na Hubert Sugira uzaba ayoboye iki gikorwa.

Kigali Family Night, izajya iba buri kwezi, kandi buri kwezi kukagira insanganyamatsiko yako yihariye dore nk’umwaka utaha 2024 muri Gashyantare, bazaganira ku bagabo mu muryango, muri Werurwe baganire ku bagore harebwa ku ruhare rwabo mu kubaka umuryango muzima.

Ni gahunda yateguye mu rwego rwo gufasha imiryango itandukanye ituye muri Kigali kubona aho iganirira kubyabubaka, kungurana ibitekerezo bahana ubumenyi bwabafasha kubaka umuryango ukomeye.

Kwinjira muri uyu mugoroba “Kigali Family Night” ni ibihumbi 25Frw ku muntu umwe ndetse abazaza bazahabwa ibyo kurya no kunywa byoroheje mu rwego rwo gusabana

Abatazagera muri Park Inn Hotel aho iyi gahunda izabera, hari uburyo bashyiriweho bwo gukurikira iki gikorwa mu buryo bwa Online.

Ushobora kwiyandikisha unyuze ku rubuga rwa www.kigalifamily.com amatike agurirwa kuri uru rubuga gusa.

Impuguke mu bijyanye n’imibanire y’abantu n’abashakanye, Hubert Sugira Hategekimana ni umwe mu bazanye igitekerezo cya Kigali Family Night igiye kuba ku nshuro ya mbere

Umuhanzi Dr Muyombo Thomas [Tom Close] Umuyobozi w'ishami rishinzwe gutanga amaraso muri RBC, ni umwe mu bazatanga ikiganiro muri Kigali Family Night

Pastor Hortense Mazimpaka Umuyobozi wa Believers Worship Center ni umwe mu bazatanga ibiganiro muri uyu mugoroba w'umuryango

Umuhanzi Ngarambe François-Xavier n’umugore we Kagoyire Yvonne Solange, ni bamwe mu bazatanga ibiganiro muri uyu mugoroba w'umuryango wiswe Kigali Family Night

Iyi gahunda y'umugoroba w'umuryango igiye kuba ku nshuro ya mbere