Kuri uyu wa Kane tariki ya 13 Gashyantare 2015, Tony Blair washinze Umuryango “African Governance Initiative (AGI)”, ufasha abayobozi b’ibihugu bya Afurika kugera ku cyerekezo bafitiye ibihugu bayobora, yasuye uruganda rw’amashanyarazi akomoka ku mirasire y’izuba ruheruka gutahwa mu Karere ka Rwamagana mu cyumweru gishize.

Tony Blair yagaragaje ko uru ruganda ari runini, ati “Ruratanga icyizere ku Banyarwanda n’ahazaza heza h’u Rwanda.”

Yemeje ko mu gihe abaturage bagezweho n’amashanyarazi bibafasha mu kwiteza imbere, ashima intego u Rwanda rwihaye yo kugeza ku baturage ku kigero cya 70%, yemeza ko ruzabigeraho.

Uru ruganda rufite ubushobozi bwo gutanga megawati 8.5, rugacanira ingo z’abaturage zigera ku 1500, rwubatswe na sosiyete yo mu Buholandi “Gigawatt Global” ku masezerano rwagiranye na Guverinoma y’u Rwanda.

Tony Blair yagaragaje ko uru ruganda rukwiye kubera isomo n’abandi bashoramari, na bo bakaza gushora iyabo mu Rwanda, ati “Abantu bamenye ko bashobora kuza gushora imari mu Rwanda nta ruswa ihari, ikintu gikomeye ku bashoramari bo mu bindi bihugu.”

Minisitiri w’Ibikorwa Remezo, James Musoni, yagaragaje ko Tony Blair afasha u Rwanda kuzana impuguke mu kwiga imishinga neza, kandi n’uyu mugabo ukomeye mu Bwongereza yemeje ko hari abakozi ba AGI baba hafi Leta y’u Rwanda.

Musoni yagaragarije Itangazamakuru ko nta gushidikanya intego rwihaye izagerwaho, kuko hari imishinga myinshi iteganyijwe, by’umwihariko uyu mwaka hakaba hagiye guhita haboneka megawatt 70 ziyongera ku zo u Rwanda rusanganywe bitarenze mu Ukwakira.

Yakomeje asobanura ko hari n’indi mishinga izatanga megawatt 300 izatangira muri uyu mwaka.

U Rwanda rufite intego ko mu mwaka wa 2017 ruzaba rucanira Abanyarwanda ku kigero cya 70%, birusaba kuba rufite ingufu za megawatt 563, ariko ubu ntiruragera no kuri kimwe cya kabiri kuko izimaze kugerwaho zibarirwa hafi mu 160.

Minisitiri Musoni yavuze ko mu mwaka wa 2017 intego ishobora kuzaba itaragerwaho, ariko mu 2018 birashoboka n’ubwo byaba atari 100%, ruzaba rwegereye.

Uru ruganda rw’ingufu zituruka ku mirasire y’izuba rwuzuye rutwaye akayabo ka miliyoni 23.7 by’amadolari ya Amerika, ni rwo rwa mbere ruri ku rwego rwo hejuru muri Afurika y’Iburasirazuba,

Tony Blair, Umujyanama wa Perezida Kagame, yaherukaga mu Rwanda mu mwaka ushize, kuwa 7 Mata, mu muhango wo kwibuka ku nshuro ya 20 Jenoside yakorewe Abatutsi.

[email protected]

Mathias Hitimana