Twabitsinze nta ngufu zihari – Busingye avuga ku bikorwa by’abatifuriza ineza u Rwanda

Yanditswe na Nkurunziza Ferdinand
Kuya 7 Mata 2020 saa 02:08
Yasuwe :
0 0

Mu gihe mu Rwanda no hirya no hino ku Isi ahari inshuti za rwo hatangijwe iminsi 100 yo kwibuka ku nshuro ya 26 Jenoside yakorewe Abatutsi, Minisitiri w’Ubutabera akaba n’Intumwa Nkuru ya Leta, Johnston Busingye, yasabye abanyarwanda gukomeza guha agaciro ibikorwa by’indashyikirwa igihugu kimaze kugeraho, bima amatwi abatifuriza ineza u Rwanda.

Kuri uyu wa 7 Mata ni bwo hatangijwe ku mugaragaro icyumweru cyo #Kwibuka26 mu isura itandukanye n’uko byari bisanzwe kubera ingamba zashyizweho zo guhangana no gukumira ikwirakwira ry’icyorezo cya Coronavirus.

Minisitiri Busingye yibukije ko hateguwe ibiganiro bizajya biba buri mugoroba, uhereye kuri uyu wa 7 Mata kugeza ku wa 13 Mata 2020, bikubiyemo insanganyamatso zitandukanye kuri buri munsi zijyanye n’amateka ya Jenoside yakorewe Abatutsi ndetse n’intambwe u Rwanda rumaze gutera mu rugendo rwo kongera kwiyubaka.

Ati “Ibyo biganiro rero turatekereza ko biza gufasha buri munyarwanda wese uri mu rugo kandi turasaba ko babikurikira ndetse tuzanabikomeza nyuma ya tariki ya 13 Mata, kugira ngo bikomeze bifashe Abanyarwanda.”

Busingye yasabye Abanyarwanda bose gukoresha uburyo bw’ikoranabuhanga bushoboka, bagahamagarana ndetse bakohererezanya ubutumwa bugamije guhozanya no gufatana mu mugongo.

Yanakomoje ku batifuriza ibyiza u Rwanda, aho yashimangiye ko na mbere bajya kuruhekura mu 1994, byari ikimenyetso kigaragaza ko batarwifuriza kubaho.

Ati “Abo bantu n’iyo miryango batifuriza ineza u Rwanda barimo Abanyarwanda n’abanyamahanga, ibikorwa byabo byarakomeje, icyagiye gihinduka ni igihe n’ibikorwa ndetse n’uburyo bikorwamo kandi twagiye duhangana na byo umunsi ku munsi.”

Yakomeje agira ati “Icya mbere nshaka kubwira Abanyarwanda mu gihe nk’iki ni uko ibyo bikorwa by’abo bantu bitazatsinda; twabitsinze nta ngufu zihari, nta bushobozi igihugu kiragira […] twabitsinze abantu bagifite ihungabana rikomeye, mu gihe igihugu cyari kitarubaka ubumwe kimaze kubaka magingo aya.”

Yashimangiye ko ibyo bikorwa by’abagizi ba nabi batekerereza mu bintu bibi buri gihe, batifuriza u Rwanda ibyiza ndetse n’icyiza cyabaye ntibakigaragaze, bizagumaho ariko bidakwiye kugira uwo bisubiza inyuma na rimwe.

Busingye avuga ko ari ibikorwa bitazasimbura ibindi byiza abanyarwanda bamaze gukora […] kandi ko abatifuriza ineza u Rwanda bazabikora ariko bakageraho bakarambirwa ndetse bagatsindwa.

Ati “Gutsindwa bazatsindwa kuko ni abantu batinya umucyo, bakorera mu mwijima, ukuri kubamerera nabi bakakwihishira mu binyoma; bahora bashaka guhimba ibintu bituma bakomeza gukorera muri uwo mwijima ariko ntibizabakundira.”

U Rwanda rumaze imyaka 26 rwubaka ibyangijwe n’abasize bakoze Jenoside yakorewe Abatutsi mu 1994; urugendo rwo kubaka ubumwe bw’Abanyarwanda rugaragara ko rwatanze umusaruro.

Buri wese ureba u Rwanda rw’iki gihe akanakurikira umunsi ku wundi ubuzima bw’igihugu yaba ari imbere cyangwa hanze y’igihugu, bimuha icyizere cyinshi cyane gituma yima amatwi ibivugwa n’inyangabirama zitifuriza ineza u Rwanda.

Ubushakashatsi bwakozwe na Komisiyo y’Igihugu yo Kurwanya Jenoside (CNLG) bwerekana ko uko ikorabuhanga rya none ritera imbere, abarwanya u Rwanda baryifashisha cyane mu gukwirakwiza impuha n’amagambo bidahuye n’ukuri kw’amateka ya Jenoside ndetse n’aho u Rwanda rugeze rwiyubaka.

Abanyarwanda bagirwa inama yo gukoresha iryo koranabuhanga na bo bakagaragaza ukuri kw’amateka y’u Rwanda kuri Jenoside kuko nibatabyikorera nta wundi uzabibakorera.

Usibye ibikorwa bitandukanye bigaragaza iterambere u Rwanda rumaze kugeraho nyuma Jenoside yakorewe Abatutsi yasize isenye igihugu ku buryo bukomeye, inzira y’ubumwe n’ubwiyunge ni ikindi gitego u Rwanda rwatsinze mu buryo benshi batari biteze.

Kugeza ubu imanza zifitanye isano na Jenoside zisa n’izenda kurangira kuko n’izisigaye inyinshi ari izirebana n’imitungo yangijwe icyo gihe.

Inkiko Gacaca zagize uruharere rukomeye mu gutanga ubutabera bwatumye hagerwa ku bumwe n’ubwiyunge mu gihe gito kuko zasize zimaze kuburanisha imanza zirenga miliyoni n’ibihumbi 200, mu gihe iyo biza guca mu nkiko zisanzwe, byari gutwara imyaka isaga 100 n’amafaranga atabarika yari kuva mu maboko y’abanyarwanda, ariko ubu akaba yakoreshejwe mu bikorwa by’iterambere.

Minisitiri w'Ubutabera akaba n'Intumwa Nkuru ya Leta, Johnston Busingye, yavuze ko ibikorwa by'abatifuriza ineza u Rwanda bitazigera bitsinda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .