Umuryango uharanira inyungu z’abarokotse Jenoside yakorewe Abatutsi mu 1994 ukorera mu Bufaransa (IBUKA/France) wakomerekejwe n’abanyamakuru ba Televiziyo France 2 bagoretse amateka ya Jenoside yakorewe Abatutsi, bavuga ko yakorewe abahutu.

Tariki ya 31 Mutarama 2015, France 2 mu kiganiro cyitwa Télé Matin, Umunyamakuru Damien Thevenot yabajije Olivier Royan nk’umutumirwa, baganiraga ku ifoto igaragaza impunzi z’Abanyarwanda zavaga muri Congo undi amusubiza ko iyo foto iteye ikibazo,igaragaza jenoside y’abahutu yakozwe n’abatutsi mu maso y’umuryango mpuzamahanga.

Iyi nkuru ikimara gutambuka kuri iyi televiziyo, Perezida wa Ibuka mu Bufaransa, Marcel Kabanda yandikiye iyi televiziyo ayimenyesha ko ibyo bakoze ari ugupfobya nkana jenoside yakorewe Abatutsi nka televiziyo ikurikiranwa n’abantu benshi.

Ubuyobozi bw’iyi televiziyo bwiseguye buvuga ko butabishakaga ahubwo habayeho kwibeshya.

CPCR yemeza ko France 2 yahakanye Jenoside yakorewe Abatutsi

Urugaga rw’imiryango yiyemeje gushakisha no gushyikiriza ubutabera abakekwaho Jenoside yakorewe Abatutsi mu Rwanda baba mu Bufaransa (CPCR) na yo ishinja France 2 guhakana Jenoside yakorewe Abatutsi iyihinduramo ko yakorewe Abahutu.

Mu kiganiro Alain Gauthier, umuyobozi w’iri huriro yagiranye na RBA yavuze ko aya magambo ari ugupfobya Jenoside ku buryo hagombye kwitabazwa amategeko, ababikoze bagahanwa.

Gauthier yagize ati “Ni uburyo bwo gushaka kuyobya abantu bagihari batazi byinshi ku byabaye muri Jenoside yakorewe abatutsi mu Rwanda , kandi ibyo bigira uruhare mu kujijisha abantu ari byo bamwe mu banyabwenge cyangwa abiyita bo n’abanyapolitiki b’aha mu Bufaransa bashaka gukora.”

Yakomeje avuga ko iyi mvugo idakwiye kwihanganirwa, ati “Uvuze ko habayeho jenoside y’Abanazi yakozwe n’Abayahudi, mu by’ukuri haba habayeho gukoza agati mu ntozi. Mbese ni ibintu tutakwemera, kandi kubera ko ari uguhakana jenoside bikwiye kujya mu rwego rw’amategeko.”

Alain Gauthier n'umufasha we Daphrose Gauthier

CPCR yakoze ibikorwa bitandukanye mu gukora ubuvugizi ku bakekwaho kugira uruhare muri Jenoside yakorewe abatutsi ngo bafatwe, ariko ikaba igihura n’ingorane nyinshi.

Ati “Dufite ikibazo cyo kwikorera umutwaro w’ubutabera hano mu Bufaransa uremereye cyane ugereranyije n’ubushobozi bw’intugu zacu”.

Nyamara ngo Loni yari ikwiye guhagurukira iki kibazo igatera inkunga CPCR mu gukomeza uru rugamba mu gihe urukiko rwa Arusha rwashyiriweho gukurikirana abagize uruhare muri jenoside yakorewe abatutsi, ruzaba rufunze.

Gauthier avuga ko yasabye ubu bufasha bakimwa igisubizo, ati“Kugeza ubu nagerageje kwandika itangazo ngirango nkangurire abigeze gukorera imiryango mpuzamahanga ikomeye. Hashize kandi amezi make nandikiye Ban ki-Moon, umunyamabanga mukuru wa Loni ngirango mumenyeshe ikibazo twagize, ikibabaje ariko ntiyansubije.”

Mu Bufaransa hari amadosiye y’Abanyarwanda 30 bakekwaho kugira uruhare muri Jenoside yakorewe abatutsi bivugwa ko ashobora kuzaburanishwa.

Mu minsi yashize havuzwe ko Ngenzi Octavien na Barahira Peter bigeze kuyobora Komini Kabarondo bari hafi kuburanishwa.

Mu bandi harimo Col Laurent serubuga, wari umugaba mukuru wungirije zu Rwanda kuri leta ya Habyarimana, hari kandi Dr Munyemana Sosthene na Rwamucyo Eugene na Padiri Wenceslas Munyeshyaka.