U Buyapani bwatanze inkunga yo kwigisha gusana imihanda mu Rwanda hakoreshejwe Do-nou

Yanditswe na Ferdinand Maniraguha
Kuya 25 Gashyantare 2019 saa 05:47
Yasuwe :
0 0

Leta y’u Buyapani yatanze inkunga y’amadolari 260 736 (asaga miliyoni 230 Frw) yo kwigisha urubyiruko rw’u Rwanda uburyo buhendutse bwo gusana imihanda yo mu byaro hakoreshejwe ikoranabuhanga rya Do-nou.

Iyi nkunga yahawe umuryango w’Abayapani utegamiye kuri Leta, CORE mu mushinga wawo wo kwigisha urubyiruko rw’u Rwanda gusana imihanda yo mu cyaro hifashishijwe ibiri hafi yarwo.

Do-nou ni ikoranabuhanga gakondo Abayapani bo mu byaro bifashisha basana imihanda y’imigenderano bitabahenze.

Ubwo buryo bwifashisha itaka risanzwe aho barifata bakaripakira mu mifuka, bagahambira hanyuma bakayigerekeranya ahantu umuhanda w’igitaka wangiritse cyane ahakunze kureka amazi mu gihe cy’imvura, barangiza bakorosaho itaka bagatsindagira.

Inkunga yatanzwe izifashishwa mu kwigisha urubyiruko 200 imikoreshereze ya Do-nou mu turere twa Nyaruguru, Nyamagabe, Ruhango na Rutsiro mu gihe cy’amezi 12 uhereye muri Werurwe uyu mwaka.

Ambasaderi w’u Buyapani mu Rwanda, Takayuki Miyashita, yavuze ko urubyiruko rw’u Rwanda ruzungukira muri uwo mushinga kuko uzabaha ubumenyi bwo kwihangira umurimo.

Ati “Inyungu ni uko iri koranabuhanga rizasakara mu rubyiruko kandi twifuza ko rushyiraho amakoperative akora ibya Do-nou hirya no hino mu gihugu, rugahanga akazi kandi rukagira impinduka mu buzima bw’abaturage mu duce rutuyemo.”

Umuyobozi w’imishinga mu muryango CORE mu Rwanda, Kei Nakajima yavuze ko bizeye umusaruro kuko icyiciro cya mbere bakoreye mu turere twa Gakenke, Rulindo, Rusizi na Nyamasheke cyatanze umusaruro.

Nakajima yavuze ko intego yabo atari ugusana imihanda ahubwo ari ugusangiza urubyiruko ubumenyi bwo kuyisana hakoreshejwe Do-nou, hanyuma rukabubyaza umusaruro.

Yagize ati “Mu gihe bamaze kubona amahugurwa, ikigenderewe ni ukubinjiza mu mwuga wo gukora imihanda, bakajya gushaka amasoko bakoresheje ikoranabuhanga rya Donou. Ikiri gukorwa ni ugusaba amasoko mu turere kugira ngo iryo koranabuhanga rikoreshwe.”

Icyiciro cya mbere cy’uyu mushinga cyatangiye muri Werurwe umwaka ushize kizarangirana na Gashyantare uyu mwaka higishijwe urubyiruko 168 ndetse hasanwe kilometero imwe y’imihanda.

Mu cyiciro cya kabiri biteganyijwe ko hazasanwa kilometero 1.2 y’imihanda ari nayo izifashishwa higishwa urubyiruko 200.

Reba uko Do-nou zikorwa mu bitaka n’imifuka

Ambasaderi Miyashita na Nakajina nyuma yo gusinya amasezerano y'inkunga
Ambasaderi Miyashita na Nakajina nyuma yo gusinya amasezerano y'inkunga
Ambasaderi Miyashita hamwe n'abayobozi b'umushinga muri Core Rwanda
Abantu babanza gushyira itaka mu mifuka, bakayisasa mu muhanda
Barenzaho itaka ku buryo uba umuhanda usanzwe, ariko ukomeye ku buryo uzira ibinogo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza