Kuri uyu wa Kabiri tariki 03 Werurwe 2015, Amb. Gelling yabwiye abanyamakuru ko igitegerejwe ari umwanzuro wa Guverinoma y’u Rwanda ku byo yasabwe na Komite yashyiriweho kugenzura uruhare rw’iyi filimi mu gupfobya no guhakana Jenoside birimo gusesa amasezerano yose ifitanye n’iki gitangazamakuru n’ibiganiro byacyo ntibizongere kumvikanira ku mirongo ya FM mu Rwanda.

Yagaragaje ko ntacyo u Bwongereza bwakora ku byo iyi komite yabonye mu mezi ane yamaze ikora ubucukumbuzi, igasanga iyi filimi yarabogamye hagendewe ku bimenyetso birimo inyandiko, ibitabo, na raporo zivuga kuri Jenoside yakorewe Abatutsi, imanza zaciwe ku byaha bya Jenoside, amategeko y’u Rwanda, amasezerano mpuzamahanga, amahame y’itangazamakuru, umurongo w’amakuru ya BBC, ndetse n’ibyavuzwe n’abatangabuhamya.

Amb. William Gelling ahamya ko umubano uzakomeza n'iyo u Rwanda rwakwemeza ko ruhagaritse gukorana na BBC/ Ifoto: C. Uwiringiyimana

Yagize ati “U Bwongereza butegereje icyo Guverinoma y’u Rwanda izakora kuri BBC...Hari icyo izavuga ku byo komite yabonye, dukwiye kubitegereza ni bwo tuzamenya icyakurikira.”

Nubwo yagaragaje ko hagitegerejwe uruhande rw’u Rwanda kuri iyi ngingo, yashimangiye amagambo aheruka kuvuga mu Gushyingo 2014 ko ntacyo Leta y’u Bwongereza yakora kuri BBC nk’urwego rwigenga, ndetse ko bataniteguye kurusabira imbabazi.

Ati “Ntitwakwisegura ku kigo tudafite gucunga. Nta ruhare dufite mu kugenzura umurongo w’itangazamakuru wa BBC.”

Yashimangiye ko icyo Guverinoma y’u Bwongereza yifuza ari uko ishami rya BBC ry’Ikinyarwanda ryakongera gufungurwa kuko icyo barebaho ari uko u Rwanda rwaba ruha urubuga ibitagazamakuru bitandukanye.

BBC ihagaritswe mu Rwanda ntiyahungabanya umubano w’ibihugu byombi

Amb. Gelling yakomeje agaragaza uburyo u Rwanda n’u Bwongereza bikomeje umubano ndetse n’inkunga isanzwe itangwa Ikigega cy’Abongereza gitera inkunga ibihugu biri mu nzira y’Amajyambere DFID ikaba izakomeza gutangwa.

Umuyobozi wa DFID mu Rwanda, Laure Beaufils, yamwunganiye yemeza ko muri uyu mwaka iki kigega cyageneye u Rwanda miliyoni 68 z’ama-pound zingana n’amafaranga y’u Rwanda miliyari 68 azakomeza gukoreshwa mu buryo inkunga zabo zikoreshwa na Leta.

Ambasaderi w’u Bwongereza mu Rwanda, William Gelling ateze amatwi abanyamakuru/ Ifoto: C. Uwiringiyimana

Abajijwe niba abashoramari b’Abongereza badashobora gucibwa intege no kumva u Rwanda rwasheshe amazerano na BBC, bigatuma bamwe mu banyotewe kuzana imari yabo bisubiraho, yemeye ko bishoboka ariko atari byo byahabwa amahirwe menshi.

Yashimangiye ko n’ubusanzwe hari abashoramari b’Abongereza basanzwe bafite ibikorwa bitandukanye mu Rwanda nko mu buhinzi, uburezi, ubucuruzi n’icungamutungo, n’ahandi.

[email protected]
Twitter: @jctwittonda