Raporo iheruka gusohorwa n’urubuga rw’Abongereza rukora isesengura ku mikoreshejereze ya internet rwitwa ‘Cable.co.uk’, igaragaza igiciro cya Gigabite [GB], igaragaza ko mu Buhinde aricyo gihugu gifite impuzandengo y’igiciro cya internet iri hasi.
Iyo nyigo yakorewe ku bigo 6,313 bifite amasezerano yo gucuruza internet byo mu bihugu 230, igaragaza ko mu Buhinde GB imwe igurishwa ku mpuzandengo y’amadolari 0.26$, Kyrgyzstan ikagurwa kuri 0.27$, Kazakhstan ikagurishwa 0.49$, Ukraine ikagurwa 0.51$ naho u Rwanda ikagurwa ku mpuzandengo y’amadolari 0.56$, hafi 504.31Frw.
Isobanura ko aho impuzandengo y’igiciro cya Internet kiri hasi ahanini biterwa n’uko icyo gihugu cyashyize imbaraga mu kwihutisha no kumenyekanisha serivisi z’ikoranabuhanga, bigafungura amarembo ku bigo biyicuruza byinshi.
Muri Afurika ikindi gihugu kiza ku mwanya wa hafi ni Sudan ikurikira u Rwanda, aho impuzandengo ya GB imwe ari amadolari 0.68$, Repubuliha Iharanira Demokarasi ya Congo ikaza ku mwanya wa 10 aho GB imwe igurishwa 0.88$.
Muri Afurika y’Iburasirazuba, u Burundi nibwo buza hafi inyuma y’u Rwanda aho ku rutonde rusange buri ku mwanya wa 39, GB imwe ikaba igurishwa ku mpuzandengo y’amadolari 2$, agera hafi ku 2000 Frw. Igiciro cyayo kikubye ishuro enye ku cyo mu Rwanda.
Nka Kenya iza ku mwanya wa 54 aho impuzandengo y’igiciro cya GB imwe ari amadolari 2.54$, Uganda ku mwanya wa 103, impuzandengo y’igiciro cya GB imwe ikaba amadolari 4.49$, Tanzania ku mwanya wa 128, GB ikagurisha ku mpuzandengo y’amadolari 5.93$.
Iyo raporo igaragaza ko igihugu gifite internet igura umugabo igasiba undi ari Zimbabwe, kuko iza ku mwanya wa nyuma aho impuzandengo y’igiciro cya GB imwe igurishwa amadolari 75.20$ (abarirwa mu bihumbi 75Frw). Muri iki gihugu, ikigo gicuruza internet ihenze kigurisha GB imwe amadolari $138.46.
Mu bindi bihugu usanga internet ihenze ku Isi harimo Guinea Equatorial iri ku mwanya wa 229 aho impuzandengo y’igiciro cya GB imwe ari amadolari 65.83$, Ibirwa bya Saint Helena (228) ikagurishwa kuri 55.57$, Ibirwa bya Islas Malvinas(227) igurishwa 47.39$ na Djibouti(226) igurishwa 37.92$.
Iyi Raporo isobanura ko ibihugu byamaze gukwirakwizamo imiyoboro ikwirakwiza internet ari byo usanga igiciro cya internet gihenze, aho nka Leta Zunze Ubumwe za Amerika iza ku mwanya wa 184 aho impuzandengo y’igiciro cya GB ari amadolari 12.37$.
Muri rusange ibihugu byo muri Aziya nibyo byinshi byaje mu myanya 2o ya mbere y’ibifite internet ihendutse ariko nanone uretse Zimbabwe iza mu bihugu bya nyuma bifite Internet ihenze muri Afurika yo munsi y’Ubutayu bwa Sahara, aka gace gafite ibihugu 10 muri 50 bya mbere bifite internet ihendutse ku Isi.
Umusesenguzi w’urubuga Cable rwakoze ubu bushakashatsi, Dan Howdle, yavuze ko ‘Byinshi mu bihugu bifite internet ihendutse biri mu cyiciro cy’ibifite ibikorwa remezo bifasha gutanga internet ihagije bigatuma igiciro cya GB kijya hasi mu gihe ibindi bifite ibikorwa remezo bicye ariko guverinoma zigategeka ko ibiciro bishyirwa hasi kugira ngo abantu babashe kuzigura’.
Imibare y’Urwego Ngenzuramikorere, RURA, igaragaza ko kugeza mu Ukuboza 2018, abanyarwanda bangana na 52.1% ari bo bakoreshaga internet bavuye kuri 7.9% babarwaga mu 2010.
Imibare yerekana ko internet ya 2G na 2.5G zigera ku buso bwa 99.13% mu gihugu no ku baturage 99.92%, internet ya 3G na 3.5G zigera ku buso bwa 77.40% no ku baturage 93.37%, mu gihe 4G LTE igera ku buso bwa 94.2% no ku baturage 96.6%.
Muri iri tumanaho ryose telefoni zigendanwa ziza imbere kuko n’abazitunze biyongereye, bakagera kuri 9, 700,609 bangana na 82.1% by’abaturage bose kugeza mu Ukuboza 2018 mu gihe abakoresha telefoni zo mu nzu ari 12,960 bingana na 0.1%.
TANGA IGITEKEREZO