Bwa mbere muri Afurika u Rwanda nirwo rugiye kwakira inama y’ Ihuriro ry’Isi ku iterambere ry’ibicuruzwa byoherezwa mu mahanga. Iyi nama izabera i Kigali hagati ya 15 na 17 Nzeli muri uyu mwaka.

U Rwanda rwiyemeje kongera ibicuruzwa bijya mu mahanga binyuze mu guteza imbere inganda, ibigo bito n’ibiciritse. Nk’uko Minisiteri y’Ubucuruzi ibitangaza, Ibijyanye n’inganda biri ku kigereranyo cya 16% by’umusaruro winjizwa n’abatuye igihugu (GDP), ubwubatsi bukaba bufashe umubare urenga kimwe cya kabiri.

Umutungo ucuruzwa wazamutseho 11% muri 2012 mu nganda zakozweho ubushakashatsi, impuzandengo ku mikoreshereze y’ubushobozi zifite ikaba ari 65%.

Ubushobozi bukoreshwa bwagaragaye nk’ikibazo cyihariye mu nganda zikora ibikoresho by’ibanze, izikora ibikoresho by’ubwubatsi n’ibigo bitanga serivisi z’ubwubatsi. Impuzandengo ku musaruro utangwa n’umukozi ku nganda zakozweho ubushakashatsi yarazamutse igera kuri 6.7% muri 2012.

Ubusanzwe u Rwanda rwohereza hanze ibihingwa ngandurabukungu by’Icyayi na Kawa cyane. Ibindi byoherezwa hanze ni ibiva mu bukorikori, mu biribwa, mu ndabo n’ibindi.

Minisiteri y’Ubucuruzi yagiye ishyiraho ingamba igamije kongera umubare w’ibijya hanze binyuze mu kuzamurira ubushobozi ibigo bito n’ibiciriritse.

Umuyobozi w’ikigo mpuzamahanga cy’ubucuruzi, Ancha Gonzalez yatangaje kuri uyu wa Kabiri ko iri huriro rizaba rifite insanganyamatsiko igira iti "Inganda nto n’iziciriritse: Isoko y’umurimo uvuye ku bucuruzi” .

Gonzalez avuga ko iri huriro rizaba ari umwanya wo kwiga ku buryo inganda nto n’iziciriritse zakongererwa ubushobozi hareberwa hamwe imbogamizi zituma zidatera imbere.

Ati "Inganda nto n’iziciriritswe ni inkingi ya mwamba y’ubukungu bw’Isi mu bihugu byateye imbere aho zitanga akazi kuri bibiri bya gatatu by’abaturage. Ariko ni ingenzi cyane kurushaho mu bihugu bikiri mu nzira y’amajyambere kuko zitanga akazi kuri 80% by’abaturage zikaba urufunguzo rw’iterambere kuri bose”.

Iri huriro ku iterambere ry’ibicuruzwa byoherezwa mu mahanga rizahuza abayobozi bakomeye bo mu bihugu no mu miryango mpuzamahanga barenga 500, abayobozi b’imiryango itera inkunga ubucuruzi n’ abayobozi b’ibigo by’ubucuruzi.

Si ubwa mbere u Rwanda rwakiriye inama ikomeye cyane kuko nko mu mwaka wa 2014 rwakiriye inama ya Banki Nyafurika Itsura Amajyambere yahuriwemo n’abarenga 3000 bavuye mu bihugu bya Afurika hafi ya byose no ku yindi migabane