00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwagaragaje uruhare rw’u Bufaransa n’amahanga ku gupfobya Jenoside

Yanditswe na

Deus Ntakirutimana

Kuya 10 April 2015 saa 08:03
Yasuwe :

Abayobozi batandukanye mu Rwanda bagaragaje uruhare rw’ibihugu birimo u Bufaransa n’imiryango itandukanye mu gupfobya Jenoside yakorewe Abatutsi no kuba abavugizi b’abagize uruhare muri iyi Jenoside.

U Bufaransa bwakunze kuvugwaho kugira uruhare muri Jenoside yakorewe Abatutsi. Urugero rwa hafi ni ubushakashatsi bwakozwe n’uwari Senateri icyo gihe Dr Bizimana Jean Damascene, ndetse no mu buhamya bwatanzwe n’abarokotse iyi Jenoside n’abayigizemo uruhare ruziguye n’urutaziguye.

CNLG yerekanye ibihugu byavuzwe n’Umukuru w’Igihugu

Umunyamabanga Nshingwabikorwa wa Komisiyo y’igihugu yo kurwanya Jenoside Dr Bizimana Jean Damascene yasobanuye ko mu gutangiza icyumweu cyo kwibuka ku nshuro ya 21 abazize Jenoside yakorewe Abatsutsi, Perezida Kagame yavugaga u Bufaransa bwarekuye uwakekwagaho kugira uruhare muri Jenoside yakorewe Abatutsi.

Ati “Nyakubahwa Perezida wa Repubulika yabigarutseho mu ijambo rye avuga ku birebana n’umuntu n’ubwo atavuze igihugu ariko ni u Bufaransa ni bwo buherutse gufata icyemezo cyo kutohereza umunyarwanda witwa Muhayimana wakoreye Jenoside ku Kibuye.”

Yakomeje avuga ko ari bimwe mu bimenyetso byo guhakana no gupfobya, ati “kutamwohereza bitwaje ko ngo mu Bufaransa ndetse no mu Rwanda Jenoside itahanirwaga mu 1994, aho bakirengagiza ko kuba itarahanirwaga mu Rwanda ari uko nyine abayikoze, abayiteguye ari bo bari ku butegetsi, ni na bo bashyizeho politiki ivangura, iganisha kuri Jenoside, nta kuntu bari gushyiraho itegeko rizabahana ubwabo.”

Iki gihugu n’ibindi ngo byiregangiza byinshi kuko “Loni yashyizeho Urukiko ruhana abakoze icyaha cya Jenoside mu Rwanda (ICTR) nyuma y’aho iyo Jenoside imariwe gukorwa. Kwitwaza icyo kintu ni ukurengera ni ukuyobya ni ugushuka ni ukugaragaza ko badashaka kugaragaza abo bantu.”

Atangiza igikorwa cyo kwibuka ku nshuro ya 21 Jenoside yakorewe Abatutsi, Perezida Kagame yagarutse ku ruhare rw’iki gihugu kimwe n’ibindi by’u Burayi ndetse n’imiryango itandukanye ikomeje guhakana no gupfobya Jenoside yakorewe Abatutsi, ibicishije mu buryo butandukanye.

Ibi bikorwa byo guhakana no gupfobya iyi Jenoside birimo no gufata nk’abanyacyubahiro abagize FDLR umutwe uvugwa ko ari uw’iterabwoba unagizwe n’abasize bakoze Jenoside, n’ibindi.

Yagize ati “Amahanga yose tuzi afata abajenosideri nka VIPs (abanyacyubahiro), ntawe ubakoraho bararinzwe, n’abicaye mu bihugu bagambaniramo kugaruka gukora jenoside hano, bararindwa, bakabwirwa ko abo babikora atari imigambi mibi ahubwo ari imigambi irwanya ubuyobozi bubi buri mu Rwanda, butarimo Freedom (ubwisanzure), butarimo Democracy (Demokarasi). Ugiye kubaza ahantu hatari freedom (ubwisanzure) ku Isi yose bakubwira ko ari mu Rwanda. Ahatari Democracy (Demokarasi) ku isi yose bakubwira ko ari mu Rwanda.”

Ibi bikorwa kandi ngo byajyanye no guhoza u Rwanda ku cyizere cyo kurandura FDLR ahubwo hakorwa ibitandukanye n’iyo mihigo.

Ati “…Isi yose iteranira ku Rwanda, birangije Isi yose ivuga ko ishaka gukemura icyo kibazo (M23) ndetse, igakemura n’ikindi kibazo iyo si yari yaribagiwe cy’abicanyi bari muri wa muhigo navugaga, abajenosideri bari hakurya hariya y’umupaka, bamaze imyaka 21.., barangije Isi yose iragenda ijya muri Congo bica M23 bayiziza na bwo icyo iri cyo, isura yayo, barayirangiza, batubeshye ngo bagiye gukemura ibibazo byose ari M23, ari FDLR, ari ADF, ari ama groups (amatsinda) menshi arwanira ibindi birebana n’abandi bitari u Rwanda. Reba kugira ngo isi yose ihagurukire ibibazo bimaze nk’imyaka itatu, ibiri, umwe,10, yirengagize ikibazo kimaze imyaka 21.”

Nyuma yo gutsemba M23, aya mahanga ngo yagaragaje ko ikibazo cya FDLR kitabashishikaje.

Umukuru w’Igihugu ati “Barangije hasigara FDLR bati ‘yo urareba ntabwo ikiri FDLR, ntibakiri abajenosideri ni abuzukuru b’abajenosideri,… ntituri bubakoreho n’ubundi iki ntabwo ari ikibazo, bagihindura icya politiki batangira kubashakira kubarengera bitwaje politiki bavuga ko bashobora kuba barazize impamvu zayo.”

Yongeyeho ati “Ibihumbi byinshi by’abantu bishyinguye hano, tunibuka uyu munsi aho turi, bivuze ko mu by’ukuri buriya gupfa kwabo ntabwo ari ibyo bita Jenoside, bishobora kuba bifite impamvu za politiki zabiteye, zishobora kugira ikizisobanura, kubera iyi mpamvu ni yo mpamvu FDLR bayifata nk’amata y’abashyitsi. Ni yo mpamvu ntawe ugomba kuyikoraho.”

U Bufaransa bwagarutsweho

Perezida Kagame yatanze urugero rw’amahanga akomeje guhakana no gupfobya Jenoside yakorewe Abatutsi biciye mu nzira zitandukanye.

Ati “Ejobundi mu gihugu cy’u Burayi bajya gucira urubanza umuntu wakoze Jenoside, hano mu Rwanda uzwi n’Abanyarwanda bose, umucamaza ati ‘ariko urabizi, uyu muntu ibyo bamurega ngo yaba yarishe abantu muri Jenoside, icyo cyaha no mu mategeko niba yaranabikoze cyangwa ajya kubikora ntabwo iryo tegeko ryariho, ubwo rero ni umwere’!”

Yakomeje yibaza ati “Icyo bivuze, erega yishe abakwiriye gupfa nyine ubwo ni cyo bivuze, ni cyo tuvanamo, kandi bikitwa ko atari Leta, buriya byagiye mu bucamanza ni amategeko!”

Yagaragaje ko ibi bitari bikwiye mu gihe mbere ye hari abandi bari bakurikiranyweho kugira uruhare muri Jenoside yakorewe Abatutsi bagiye bakurikiranywa n’ubutabera bw’u Bufaransa n’ibindi bihugu by’u Burayi.

Filimi ya BBC na Jane Corbin yagarutsweho

Umukuru w’Igihugu yanenze Filimi yakozwe n’umunyamakuru Jane Corbin yatambutse kuri BBC2, ishami rya televiziyo ya BBC irebwa na benshi ku Isi.
Ati “Ejobundi mbere yaho gato (yo kurekura uwakekwagaho Jenoside mu Bufaransa) abakina za filimi ubundi tumenyereye ko ari ibintu byiza birimo creativity (guhanga ibishya), batangira noneho gukina filimi zerekana ko mu Rwanda Jenoside bavuga nta n’ubwo yabaye, n’abishwe ni bo babiteye, abahigwaga. ‘Untold story’, ikitavugwa cy’u Rwanda ni uko abahigwaga ari bo byaturutseho, ubwo na byo tukabyumva gutyo bigahita.”

U Rwanda mu kugaragaza ipfobya n’ihakana ruzerekana ibyo byose abapfobya n’abahakana jenoside bakoresha, birimo kwanga gukurikirana abakoze Jenoside bagashakisha impamvu ubundi zidafite ikizisobanuye.

Izindi ngamba rufite harimo kubanza gusobanura neza amateka ya Jenoside, kwerekana ukuri kuyigize, uko yateguwe no kugaragaza ibimenyetso byose bihari, uko yashyizw mu bikorwa, bigasobanurirwa Abanyarwanda ndetse n’abanyamahanga hashingiwe ku byemejwe n’umuryango mpuzamahanga ubwabo kuko kuba Jenoside yarabayeho ari icyemezo cyemejwe na loni.

Mu gukomeza guhangana n’ibi byiciro by’abantu kandi mu mwaka wa 2013 u Rwanda rwavuguruye Itegeko rihana ingengabitekerezo ya jenoside ryashyizweho mu mwaka wa 2008.

Hari n’ icyemezo cyafashwe umwaka ushize (wa 2014) n’inama ya loni ishinzwe amahoro ku Isi, mu mwanzuro wa 22 150 gisaba ibihugu byose bigize Isi, gushyiraho amategeko ahana ipfobya n’ihakana rya Jenoside, yose yemewe mu Rwanda.

CNLG izakomeza muri uru rugamba, iti “Twebwe tuzasobanurira ibihugu by’inshuti , tuzabasobanurira ko hari icyemezo ko basabwa kubishyira mu bikorwa. Hari ibihugu byashyizeho amategeko ahana abahakana n’abapfobya Jenoside, u Butaliyani hashize amezi abiri bushyizeho itegeko rihana abapfobya n’abahakana buri jenoside yose yemewe, u Busuwisi busanganywe iryo tegeko, Luxembourg irarifite.Tuzareba ibisanzwe birifite abe ari ho hatangirwa ibirego kurusha ahandi, bije byuzuza cyo gusaba ko gishyirwa mu bikorwa.”

[email protected]

twitter: @NtakirutaDeus


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .