Aya masomo basoje kuri uyu wa 20 Ukuboza, atangwa n’urugaga rw’abunganira muri gasutamo abatumiza n’abohereza ibicuruzwa mu mahanga (Rwaffa), rufatanyije n’Ikigo cy’Imisoro n’Amahoro (RRA) n’ibyo mu muryango wa Afurika y’Iburasirazuba.
Bahuguwe uburyo bwo kumenyekanisha no kwishyura imisoro, amategeko abigenga, gukoresha ikoranabuhanga, kumenyekanisha ibicuruzwa ku byambu, gufasha abajyana n’abakura ibicuruzwa mu mahanga, gufata neza abakiliya n’uburyo bwo guhanahana amakuru.
Umuyobozi wa Rwaffa, Seka Fred, yagize ati “Mbere nta murongo dukoreramo twagiraga nk’abanyamwuga, twakoraga mu buryo bwo kwihangira umurimo ariko tugashaka uko twamenyekanisha n’imisoro, biba ngombwa ko twongerera ubumenyi ababikora.’
Ati “Ubumenyi muhabwa, bubaha ubushobozi bwose bwuzuye bwo gukora muri uyu mwuga, uretse no kubukorera hano iwacu gusa mukaba mwanabikorera no muri kimwe mu bihugu bigize EAC.”
Komiseri wa Gasutamo, Uwamariya Rosine, yavuze ko abantu bibeshya ko uyu mwuga, umuntu wese ashobora kuwukora.
Ati “Ndagira ngo mwebwe mwerekane ko atariko bimeze. Kuba umuntu ufasha abatumiza n’abohereza ibintu mu mahanga bisaba ubumenyi, ubuhanga no kubikunda.”
Yavuze ko bazanafasha abacuruzi kuzuza inshingano zo gutanga umusoro, binoroshye uburyo bwo gukora ubucuruzi mu Rwanda no muri Afurika.
Ikinyamakuru Forbes giherutse gushyira u Rwanda ku mwanya wa mbere mu bihugu birengera abashoramari.
Raporo ya Banki y’Isi ya ‘Doing Business 2018’ yo mu Ukwakira 2017 yerekanye ko u Rwanda rwongeye kuba igihugu cya kabiri muri Afurika yo munsi y’Ubutayu bwa Sahara cyorohereza abashoramari, rukaza ku mwanya wa 41 ku Isi.
Ingabire Rose wasoje aya mahugurwa yavuze ko babonye ‘ubumenyi ku buryo twumva twiteguye gufatanya n’abandi dusanzemo kugira ngo tubashe kubaka igihugu, tubafasha mu buryo bwo kwishyura imisoro uko bikwiye, biborohereze no gucuruza.’
Aya mahugurwa amaze gutangwa mu byiciro bine kuva mu 2018. Abayahawe bose hamwe ni 755.
TANGA IGITEKEREZO