00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwungutse abapilote 17 bigishirijwe imbere mu gihugu

Yanditswe na Léana Bisa
Kuya 28 May 2022 saa 09:44
Yasuwe :

Abanyeshuri 17 bahawe impamyabushobozi zigaragaza ko barangije amasomo yo gutwara indege, bikaba bizaziba icyuho cyagaragaraga cyo kuba abapilote b’abanyarwanda bari bake.

Ni impamyabumenyi zatanzwe kuwa Kane w’iki cyumweru ku bufatanye bwa Akagera Aviation, Minisiteri y’Ibikorwa remezo na Sosiyete Nyarwanda ikora ubwikorezi bwo mu kirere, RwandAir.

Abahawe impamyabushobozi barimo abakobwa babiri, bari bamaze imyaka ibiri biga amasomo yo gutwara indege. Iki kikaba ari icyiciro cya mbere cy’abanyeshuri bigishijwe na Akagera Aviation gutwara indege za gisivili. Ubusanzwe iki kigo cyigishaga abatwara indege za kajugujugu.

Aba banyeshuri bigishijwe gutwara indege mu buryo bwanditse ndetse no mu bikorwa. Kugira ngo babashe guhabwa icyangombwa cyo gutwara indege za gisivili (commercial pilot license) bagomba kumara amasaha angana na 240 batwaye indege mu kirere, bakora ibizamini bitandukanye harimo icyo kumenya gutwara ku manywa, nijoro ndetse no mu birere bitandukanye.

Aba banyeshuri ndetse n’ababyeyi babo bagaragaje ibyishimo byo kuba uru rugendo barurangije bakaba bahawe impamyabushobozi.

Eddyne Umuhoza umwe mu bakobwa babiri witabiriye aya mahugurwa ndetse agahabwa n’igihembo cy’umunyeshuri wahize abandi, yavuze ko urugendo rutari rworoshye ariko ko ashimira Imana ko yabibagejejeho.

Ati “Uru rugendo ntirwari rworoshye ariko ndashimira Imana ndetse n’abatoza bacu kuko byari kuba bigoye kurushaho iyo tutabagira, ndashimira cyane Akagera Aviation ndetse na RwandAir kuba baratwizeye bakaduha aya mahirwe.”

Umuyobozi wa Akagera Aviation, Patrick Nkurikiyimfura, yavuze ko kuba aba banyeshuri barangije kwiga batifitiye akamaro gusa ahubwo ko bafitiye akamaro igihugu cyose.

Yagize ati “Ni ibintu byiza cyane kuba aba banyeshuri barangije kwiga aya masomo, ni ubwa mbere mu mateka y’u Rwanda tugize abapilote b’Abanyarwanda batorojwe mu Rwanda, ni intambwe nini cyane yerekana ibyo dushobora gukora nk’Abanyarwanda.”

Yavuze ko urwego rw’indege mu Rwanda ruri gutera imbere kandi ko hakenewe aba pilote benshi b’abanyarwanda.

Ati “urwego rw’indege mu Rwanda ruri gutera imbere kandi dufite aba pilote bake cyane, ni ngombwa rero ko twebwe nk’Abanyarwanda twiyungura ubumenyi muri iyi ntera tugatera imbere.”

Umuyobozi wa RwandAir, Yvonne Manzi Makolo, yavuze ko bigaraga ko mu Rwanda hakenewe abapilote kandi ko bagomba kuva mu banyarwanda ubwabo.

Ati “Urwego rw’indenge ni ingenzi cyane mu bukungu bw’igihugu kandi ruri gutera imbere cyane, ariko hari imbogamizi y’uko hari abapilote bake, rero kugira Abanyarwanda batangiye kungukira ubumenyi muri Akagera Aviation bishobora kudufasha cyane.”

Yakomeje avuga ko kugira abapilote b’Abanyarwanda bizafasha urwego rw’ubwikorezi bw’indege kubona abakozi mu buryo bworoshye kandi budahenze.

Yagize ati “Nko kuri RwandAir bizadufasha gukemura ikibazo cy’abakozi birushijeho, binadufashe kubona abakozi badahenze kandi b’Abanyarwanda aho kuzana abanyamahanga.”

Yavuze ko ubwo inzira z’ikirere zimwe na zimwe zigiye kongera gufungurwa nyuma y’igihe kirekire zifunzwe kubera Covid-19 hazaboneka amahirwe menshi ku bapilote kuko bazaba bakenewe cyane birushijeho.

Umunyamabanga wa Leta muri Minisiteri y’ibikorwa remezo, Patricie Kabasha, yavuze ko Leta yifuza gukomeza guteza imbere urwego rw’indege kuko nk’igihugu kidakora ku nyanja dukeneye abantu bafite ubumenyi bwo gutwara indenge zitandukanye.

Yagize ati “Igihugu cyacu gifite gahunda y’igihe kirambye yo guteza imbere urwego rw’indege, dufite sosiyete ya RwandAir y’igihugu ifite gahunda yo gukomeza kongera aho igera muri Afurika, Aziya n’u Burayi, ibyo rero biradusaba kongera umubare w’indege ndetse n’abazitwara.”

Yavuze ko gahunda yo kwigisha abanyeshuri ikomeje kandi ko hakuriyeho kwigisha abakanika indege n’abandi bakora mu bibuga by’indege.

Akagera Aviation yashishikarije abantu bose bifuza kwiga ibyerekeye indege gutera intambwe bagatinyuka bakiyandikisha baciye ku rubuga rw’iki kigo.

Ni intambwe nziza bateye mu rugendo rwabo rw'ubuzima
Ishaq Ndoli yahawe igihembo cy'umunyeshuri witwaye neza mu masomo
Hirwa Fabien ashyikirizwa igihembo
Eddie Umuhoza yahawe igihembo cy'umunyeshuri wahize abandi, yari ahagarariwe n'umubyeyi we
Umunyeshuri uhagarariye abandi yashimiye ababafashe ukuboko mu rugendo rwabo
Imiryango y'abasoje amasomo yari yaje kwifatanya na bo
Umuyobozi wa Akagera Aviation, Patrick Nkurikiyimfura yashishikarije abandi banyarwanda babyifuza gutera intambwe bakajya kwiga gutwara indege
Eddie Umuhoza yahawe igihembo cy'umunyeshuri wahize abandi, yari ahagarariwe n'umubyeyi we
Umunyamabanga wa Leta muri Minisiteri y'ibikorwa remezo, Patricie Kabasha yavuze ko guverinoma y'u Rwanda izahora ishyigikiye aba bapilote
Umuyobozi wa RwandAir yavuze ko aba banyeshuri baje bakenewe kandi babitezeho byinshi
Ku wa 26 Gicurasi 2022, abanyeshuri 17 bahawe impamyabushobozi zigaragaza ko barangije amasomo yo gutwara indege. Aha Umuyobozi wa RwandAir, Yvonne Makolo yafataga ifoto y'urwibutso n'abasoje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .