Ubusanzwe ubushakashatsi bukorwa hagamijwe kureba ikibazo runaka no gutanga ibisubizo n’inama zo kugirango bikemuke, bityo inararibonye mu burezi zivuga ko iyo budakozwe neza budakemura ikibazo.
Byagarutsweho kuwa 5 Ukwakira 2017, mu nama yateguwe na Kaminuza y’ubukerarugendo, ikorabuhanga n’ubucuruzi (UTB) ifatanyije n’umuryango uharanira kubaka uburezi Nyafurika ndengamipaka bushingiye ku bushakashatsi (ANIE: Africa Networking for Internationalization of Education), ihuza impuguke, inararibonye n’abashakashatsi mu burezi n’abandi.
Umuyobozi Mukuru wa UTB, Dr. Kabera Callixte, yavuze ko iyi nama izubaka ubufatanye mu gukora ubushakashatsi, guhanahana abanyeshuri n’abarimu, kuganira ku bufatanye n’ibibazo biri mu myigishirize ya za Kaminuza hagamijwe kubaka ireme ry’uburezi rishingiye ku bushakashatsi nyabwo.
Yagize ati “Tugomba gushaka uko Afurika yakorana kurusha uko dusanzwe dukorana n’u Burayi cyangwa Amerika. Nko mu muryango wa Afurika y’Iburasirazuba, guhuriza hamwe mu bijyanye no kugenzura ireme ry’uburezi byaratangiye.”
Yakomeje avuga ibibazo byugarije uburezi muri Afurika birimo kubona abarimu bo ku rwego rwo hejuru.
Ati “Ni ukureba uburyo bwo kubaka ireme ry’uburezi icyo bisaba. Hari nk’ingero zimwe na zimwe zijyanye n’ubushakashatsi abarimu badakora mu buryo bwiza bwuzuza ubushakasghatsi bukozwe. Ngirango icyo ni ikintu kitari cyiza abantu bakwiye kwiga uko cyarwanywa. Haba abarimu n’abanyeshuri, birakwiye ko ubushakashatsi bakora bwaba ubw’umwimerere, bw’ireme butari ubukopewe hirya no hino.”
Iki kibazo cyashimangiwe n’Umuyobozi mukuru ushinzwe ikoranabuhanga n’ubushakashatsi muri Minisiteri y’Uburezi, Dr Christine Gasinzigwa wagize ati“Ubushakashatsi ni ngomba, ni uruhare rw’amashuri makuru. Ni ngombwa kuko buriya iyo bukozwe bufasha mu gushyiraho ingamba na politiki zitandukanye.”
“Twavugaga ko biriya byo kwandukura ukabishyira ahandi uko byakabaye, ngo igihugu i Burayi cyakoze ibi nawe ukaba aribyo ukoporora, ese ibyo bifuza bihura n’ibyo ibihugu ugiye kubizanira bakeneye?”
Yakomeje avuga ko rimwe na rimwe gukoporora ubushakashatsi bw’abandi usanga biterwa n’ibibazo by’amikoro, ubunebwe bw’abashakashatsi n’ibindi kandi ko bidindiza uburezi bwa Afurika muri rusange.
Mu kiganiro n’abanyamakuru gitegura iyi nama kuwa 4 Ukwakira 2017, Umuyobozi Mukuru wa ANIE, Dr. Charles Ong’Ondo, yari yavuze ko zimwe mu nshingano zayo ari ugukora ubushakashatsi bugamije gushaka ibibazo byugarije uburezi n’ingamba zafatwa kugirango bikemuke.
Iyi nama ya munani irasozwa kuwa 6 Ukwakira 2017 yitabiriwe n’abantu baturutse mu bihugu 27. Ikurikira izindi zirimo iyabereye Kenya, Nigeria, Afurika y’Epfo, Ghana na Tanzania n’ahandi.
TANGA IGITEKEREZO