Ibi ni bimwe mu byagaragarijwe mu nama ngishwanama yo kurwanya ruswa n’akarengane mu Rwanda ihuriweho na Minisiteri y’Ubutegetsi bw’igihugu, Minisiteri y’ubutabera, Ubushinjacyaha, Polisi, ari na bwo Abanyarwanda basabwe kujya batunga urutoki ahavugwa ruswa, ngo ibashe kuranduranwa n’imizi.

Ubwo abagize iyi nama bahuraga ku wa gatanu tariki ya 17 Mata 2015 berekanye uko ruswa ihagaze mu nzego mu Rwanda.

Aho yazamutse ni mu nzego z’abikorera yari ku kigero cya 2% mu mwaka wa 2013 ikaza kwiyongera, aho yageze ku kigero cya 2.89% mu wa 2014. Hari kandi mu kigo cy’igihugu cy’Ubutaka aho yari 1.74% ikiyongera kugera kuri 1.96%. Mu nzego z’ibanze naho yariyongereye iva kuri 3.62 mu mwaka wa 2013 igera kuri 3.64 mu wa 2014.

Urwego rwa polisi na rwo yarahagabanutse aho yari ku 8.25% mu mwaka wa 2013, ukurikiyeho ikaba yarabaye 5.18%, kimwe no mu nzego z’ubucamanza kandi naho yarahaganautse iva kuri 2.38% igera ku kigero cya 1.81% mu mwaka wa 2014.

Richard Muhumuza Umushinjacyaha mukuru yatangaje ko mu mwaka wa 2013-2014, uru rwego rwakiriye ibirego 225.

Ati “Dosiye 155 zoherejwe mu nkiko naho 60 nyuma yo kubura ibimenyetso zirashyingurwa.”

Yongeyeho ko ibi byaha ari ibyagaragaye gusa, hagakorwa dosiye zabyo.
Urwego rw’umuvunyi rwasabye Abanyarwanda n’abarutuye muri rusange kurangwa n’indangagaciro, birinda ruswa kandi bayitunga agatoki aho yaba igaragaye.

Minisitiri w’Ubutegetsi bw’igihugu Francis Kaboneka yatangaje ko abakozi bagaragayeho ruswa bakurikiranwa mu gihe iyo ari abapolisi bahita birukanwa mu gihe hakunze kuvugwa itungwa ry’impushya zo gutwara ibinyabiziga z’impimbano bamwe bakabishinja polisi y’u Rwanda.

Inama ngishwanama yo kurwanya ruswa n’akarengane mu Rwanda igizwe:

1. Minisitiri w’Ubutegetsi bw’igihugu (MINALOC)
2. Abavunyi babiri bakuru bungirije
3. Minisitiri w’Ubutabera
4. Visi Perezida w’Urukiko rw’ikirenga
5. Umuyobozi mukuru wa Polisi (IGP)
6. Umushinjacyaha mukuru
7. Umugenzuzi mukuru w’imari ya Leta
8. Umunyamabanga Nshingwabikorwa w’ikigo cy’igihugu gishinzwe amasoko ya Leta
9. Abahagarariye amahuriro ya za Sosiyete sivili
10. Umuyobozi w’Urugaga rw’abikorera

[email protected]
twitter :@NtakirutaDeus