Ubutumwa inshuti z’u Rwanda zarugeneye mu gihe cyo kwibuka Jenoside yakorewe Abatutsi

Yanditswe na Iradukunda Serge
Kuya 7 Mata 2021 saa 11:10
Yasuwe :
0 0

Buri mwaka tariki ya 7 Mata u Rwanda rutangiza icyunamo cyo kwibuka abazize Jenoside yakorewe Abatutsi mu 1994; biba ari ibihe bikomeye by’agahinda igihugu n’Abanyarwanda muri rusange bifatanyamo n’inshuti zabo mu guhumuriza abarokotse.

Mbere y’icyorezo cya COVID-19 wasangaga mu gutangiza icyunamo u Rwanda rwakira abashyitsi baturutse impande n’impande gusa kuri iyi nshuro kimwe no mu 2020 iki gikorwa cyabaye hubahirizwa ingamba zo kwirinda COVID-19.

Nubwo bimeze gutya ariko ntibyabujije inshuti z’u Rwanda n’abadipolomate b’ibihugu bitandukanye koherereza Abanyarwanda ubutumwa bw’ihumure no gufata mu mugongo abarokotse. Abenshi muri aba batambukije ubu butumwa bwabo bakoresheje Twitter.

Ambasaderi w’u Butaliyani mu Rwanda, Massimiliano Mazzanti, yavuze ko Jenoside yakorewe Abatutsi ari kimwe mu bikorwa bya kinyamaswa byabayeho mu mateka y’u Rwanda.

Ati “Uyu munsi u Rwanda ruribuka ku nshuro ya 27 Jenoside yakorewe Abatutsi mu 1994 ndetse hanatangizwa icyumweru cyo kwibuka. Ni kimwe mu bikorwa by’ubugizi bwa nabi bushingiye ku moko bwabayeho mu mateka, bugakorwa ku muvuduko wo hejuru.”

Ambasade ya Suède mu Rwanda ibinyujije kuri Twitter yatangaje ko yifatanyije n’Abanyarwanda mu guha icyubahiro abazize Jenoside yakorewe Abatutsi.

Iti “Uyu munsi ni ku nshuro ya 27 hibukwa Jenoside yakorewe Abatutsi mu 1994. Duha icyubahiro abayiguyemo binyuze mu kwibuka no kwigira ku mateka. Ntituzibagirwa. Twifatanyije n’u Rwanda, uyu munsi na buri munsi uko twibuka tuniyubaka.”

Ambasaderi wa Leta Zunze Ubumwe za Amerika mu Rwanda, Peter Vrooman, yavuze ko by’umwihariko nka Ambasade bibuka Umunyarwanda wahoze abakorera nk’umushoferi akaza kwicwa muri Jenoside.

Ati “Turibuka Marc Bizimungu, wakoze muri Ambasade ya Leta Zunze Ubumwe za Amerika i Kigali nk’umusudizi n’umushoferi kuva mu 1985 kugeza mu 1994. Marc yishwe kubera ko yari Umututsi muri Jenoside, yicanwe n’umugore we Devote Mukamana, ariko abana babo bato babiri bararokotse.”

Ambasaderi Peter Vrooman ukunze no kumvikana avuga Ikinyarwanda yahise ahindura n’ifoto ye yari iri kuri Twitter ashyiraho indi imugaragaza yitegereza amafoto y’abazize Jenoside yakorewe Abatutsi.

Undi wifatanyije n’u Rwanda kwibuka abazize Jenoside yakorewe Abatutsi ni Umuyobozi wa Komisiyo y’Umuryango wa Afurika Yunze Ubumwe (AU), Moussa Faki Mahamat, abinyujije kuri Twitter yavuze ko uyu muryango wifatanyije n’u Rwanda asaba Abanyafurika n’Isi yose muri rusange ko batakwibagirwa ibyabereye mu Rwanda

Minisitiri w’Intebe wungirije w’u Bubilgii, Sophie Wilmès, yavuze ko igihugu cye cyifatanyije n’u Rwanda mu kwibuka inzirakarengane zazize Jenoside yakorewe Abatutsi.

Ati “Kuri uyu munsi mpuzamahanga wo kwibuka Jenoside yakorewe Abatutsi mu 1994, u Bubilgi burunamira inzirakarengane zose z’iki gikorwa ndengakamere, igihugu cyacu cyavuguruye ukwiyemeza kwacyo kugira ngo ubwicanyi nk’ubu ntibuzongere kuba.”

Ambasaderi wa Isiraheli mu Rwanda, Ron Adam, we yavuze ko ibyabaye mu Rwanda byari byateguwe ndetse ko bisa na Jenoside yakorewe Abayahudi (Holocaust).

Ati “Nta mwanya izindi nyito zikwiye guhabwa, iyi yari Jenoside. Yari Jenoside yakorewe Abatutsi. Amateka agira inkuru imwe! Wari umusaruro w’igikorwa cyateguranywe ubwitonzi, ubwicanyi bw’abantu bwateguwe kandi bugakoresha intwaro zaguzwe mbere. Nka Holocaust neza neza.”

Mu gihe u Rwanda rwatangizaga iki gikorwa cyo kwibuka abazize Jenoside yakorewe Abatutsi mu 1994, Minisitiri w’Ububanyi n’Amahanga, Dr Vincent Biruta, yashimye abakomeje ku rufata mu mugongo ariko yihanangiriza ababyitwaza bakagoreka inyito yayo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .