Perezida wa Tanzaniya Mrisho Jakaya Kikwete yashinze Ali Idi Siwa kurengera inyungu z’icyo gihugu mu Rwanda. Asimbuye Francis Aaron Mwaipaja.

Umubano w’u Rwanda na Tanzania wajemo agatotsi kuva mu 2013, ubwo byagiye bigaragazwa ko hari inama za gisirikare za FDLR zakorewe inshuro nyinshi ku butaka bwa Tanzania, hakaba n’ubwo zakorwaga hari abayobozi bakuru b’igisirikare cya Tanzania bagira inama abayobozi b’uwo mutwe.

Nubwo abayobozi b’ibihugu byombi bagiye bahurira mu nama za EAC zitandukanye, ntibigeze berekana amarenga y’ubucuti hagati yabo na rimwe.

Gusa umwuka w’ubusabane waranze Perezida w’u Rwanda Paul Kagame na Jakaya Kikwete wa Tanzania mu nama ya 16 y’abakuru b’ibihugu biri mu muryango wa Afurika y’Uburasirazuba ku wa Gatanu ku ya 20 Gashyantare, wafashwe nk’intandaro y’icyizere cy’umubano mwiza hagati y’ibihugu byombi.