Ikibazo cy’urusaku gikomeje guhagurutsa inzego zifata ibyemezo. Nyuma y’ingamba za Polisi y’igihugu, iki kibazo cyatumye haterana Inama idasanzwe y’umutekano mu Mujyi wa Kigali, hafatwa ibyemezo bikomeye.

Kuri uyu wa Kabiri, tariki ya 23 Nzeri 2014 hateranye inama ya Komite y’Umutekano y’Umujyi wa Kigali, iyobowe n’Umuyobozi w’Umujyi wa Kigali Ndayisaba Fidele, hanatumiwemo inzego z’umutekano n’iz’ubuyobozi bw’Umujyi wa Kigali n’Uturere twawo, Imirenge n’Utugari.

Mu byemezo bikomeye byafashwe harimo ko kurwanya urusaku bishyirwa mu mihigo y’imidugudu, amarondo akabyongera mu nshingano zayo, kandi uwateje urusaku agahabwa igihano kinini mu biteganywa n’itegeko.

Inama y’umutekano y’Umujyi wa Kigali yanzuye isaba:
– Gukangurira abaturage uburenganzira n’inshingano byo kutemera kubangamirwa no kutabangamira abandi, ibi bikazakorwa binyujijwe mu nama z’abaturage, Komite z’Imidugudu na Community Policing Committees,

– Gutegura no gukurikirana ubugenzuzi bw’ urusaku mu baturage hanozwa irondo kandi ibikorwa byo kurwanya urusaku bikajya mu mihigo y’Imidugudu,
– Kugenzura inyubako n’ibyangombwa by’insengero, utubari, utubyiniro n’ibindi bikorwa byaba imvano y’urusaku mu baturage,

– Kutajenjekera abateza urusaku rukabije no kwirinda amarangamutima mu kubahana. Ibi bikazakorwa hatangwa igihano kiri hejuru mu biteganywa n’itegeko ku cyaha cyo gusakuriza abaturage kandi hagakurikiranwa mu butabera no guhana ababangamira itangwa ry’ibihano ku mpamvu z’inyungu bwite.

Hasojwe hasabwa ko Abayobozi b’ibanze bakongera ingufu mu rugamba rwo guhangana n’abateza urusaku mu baturage kandi hagakomeza ubukangurambaga bwo kumenyesha abaturage uburengazira bwabo.