Mu mwaka wa 2012/2013 imihigo yari iteganyijwe mu Mujyi wa Kigali, kugeza ku wa 30 Kamena 2013 yashoboye kugerwaho ku gipimo kiri hejuru ya 90%. Kugira ngo ibe itarashoboye kugerwaho 100%, bikaba byaratewe na Rwiyemezamirimo batengushye ubuyobozi bw’Umujyi wa Kigali.
Ubwo itsinda rishinzwe kugenzura ishyirwa mu bikorwa ry’imihigo y’umwaka 2012/2013, mu mpera z’icyumweru gishize hasuwe Umujyi wa Kigali, hashimwe byinshi byagezweho n’ubwo hari ibindi byadindiye, ba Rwiyemezamirimo akaba ari bo batungwa agatoki, kuko hari abamaze gucibwa amande y’ubukererwe.
Muri ba Rwiyemezamirimo baciwe amande kubera ubukererwe, harimo KIPHARMA yatinze gutangwa ingwate ya Banki, igacibwa angana na 40%, ndetse n’uwubaka inzu nshya izakorerwamo n’Umujyi wa Kigali, kuko mu mihigo y’umwaka ushize ibikorwa byayo byegeze kuri 50% y’ibyari biteganyijwe.
Mu byo Umujyi wa Kigali washyize mu mihigo y’umwaka 2012/2013 harimo gushyiraho ibishushanyo mbonera by’uturere twa Gasabo na Kicukiro byakozwe 100%, gushyiraho uburyo bwo gutanga ibyangombwa bijyanye n’ubwubatsi hakoreshejwe ikoranabuhanga byakogezweho 100%, hubatswe imihanda ya Kaburimbo kuri Kilometero 10.932 bingana na 91.25, hubatswe Ruhurura za Kove na Rwarutabura ku gipimo cya 100% na ho gushyira ibyapa ku nyubako zegereye imihanda mu mujyi wa Kigali bigeze kuri 55%.
Kuri uyu muhigo wa nyuma, Umuyobozi w’Umujyi wa Kigali atangaza ko byatewe n’uko ba Rwiyemezamirimo babanje guhenda, aho icyapa kimwe cyasabaga amafaranga asaga 20,000 haboneka iby’igiciro gito igihe giteganyijwe cyo gutangiriraho cyararenze, aho icyapa kimwe kigura amafaranga y’u Rwanda 12,000. Gushyira amatara ku mihanda byarenze 100% ku hari hateganyijwe, aha Umuyobozi w’Umujyi wa Kigali atangaza ko byatewe n’uko bagenda bunguka uburyo buryo butuma ishyirwa mu bikorwa ryihuta cyane.
Ibigo nderabuzima bya Remera, Gatenga, Mageragere, Nduba na Kanyinya byashyizwemo ibikoresho, hakozwe amarushanwa yo kwandika no gusoma mu mashuri abanza n’ayisumbuye. Iki gikorwa byifujwe cyakwirakwizwa mu turere twose, kuko aho cyakozwe cyatanze umusaruro ufatika. Hashyizweho kandi ikigo gifasha abashomeri kubona amakuru ajyanye n’umurimo.
Umuyobozi w’Umujyi wa Kigali, Fidel Ndayisaba, mu kiganiro n’itangazamakuru ashima intambwe yatewe mu gushyira mu bikorwa imihigo ariko yongera kunenga ba Rwiyemezamirimo badashyira mu bikorwa ku gihe giteganyijwe ibikubiye mu masezerano abaha isoko. Agira ati “Imihigo twashoboye kuyesa ku gipimo kirenga 90%. Mu nzitizi twahuye na zo harimo na ba Rwiyemezamirimo batakoze neza imirimo yabo uko bigombye, ariko bamwe bamaze guhanwa.”
Akomeza avuga ko Umujyi wa Kigali wo udakora ibikorwa bito kuko biba bigenewe uturere ahubwo bashora amafaranga mu binini byagutse, byiganjemo ibikorwaremezo birimo kubaka imihanda, gushyiraho amatara, kubaka za Ruhurura, amavuriro, gukora ibishushanyo mbonera n’ibindi.
Egide Rugamba, Umuyobozi Mukuru muri Minisiteri y’Ubutegetsi bw’Igihugu, ushinzwe igenamigambi, igenzura n’isuzumabikorwa, mu kiganiro na IGIHE yadutangarije ko Umujyi wa Kigali, ibyinshi wateganyije mu mihigo wabigezeho ariko na we yongera kunenga ba Rwiyemezamirimo batubahiriza amasezerano bagiranye n’Umujyi. Ati “Ibyinshi bahize byagezweho, ibitaragezweho ba Rwiyemezamirimo ni bo batubahirije amasezerano, ariko twasanze hari abamaze guhanwa. Dushima imbaraga abayobozi b’inzego z’ibanze bashyira mu kubaka igihugu no guteza imbere Abanyarwanda.”
Rugamba asaba Abayobozi b’inzego z’ibanze kujya banoza igenamigambi, abashinzwe amasoko na bo bakajya bihutisha itangwa ryayo kugira ngo ibikorwa bateganyije bitazajya bidindira. Asaba kandi ba Rwiyemezamirimo kujya bihutisha gushyira mu bikorwa amasoko bahawe, bakibuka ko n’ubwo baba bari mu kazi ari Abanyarwanda kandi bakorera Abanyarwanda.
Isuzuma ry’ishyirwa mu bikorwa ry’imihigo riba rigamije kureba ko ibyahizwe byashyizwe mu bikorwa no kureba niba hari ahabaye imbogambizi hagatangwa inama ndetse n’icyakorwa ntizizongere kubaho.
TANGA IGITEKEREZO