Umunyarwanda witabiraga amarushanwa ibitaramo y’ubwiza abera muri Amerika azwi ku izina rya Blossomtime festival wafashwe yasinze mu gihe yari atwaye imodoka. Ku wa mbere tariki ya 13 Gicurasi yahamwe n’icyaha akatirwa gufungwa iminsi 180. ejo hashize.

Polisi yo muri Amerika itangaza ko mu gihe Mpamira yafatwaga amaraso, basanze afite ubusinzi buri ku gipimo cya 0,17 %, cyari kikubye inshuro ebyiri ugereranije n’icyemewe n’amategeko muri Leta ya Michigan. Yafashwe mu kwezi k’Ugushyingo 2012, mbere y’uko afatwa yabaye Rudasumbwa w’umwaka wa 2012 mu marushanwa ya Blossomtime.

Urubuga Southbendtribune dukesha iyi nkuru, ruvuga ko mu gihe cy’urubanza rwe, rwabaye kuri uyu wa mbere, Mpamira yasabye imbabazi polisi, umuryango we n’abaturage muri rusange.

Ibi bivugwa mu gihe Mpamira mbere y’uko aburana yahakanye ko nta cyaha afite. Ubwo Polisi yari igikora iperereza yararekuwe amaze gufungwa iminsi 125, kuri ubu akaba ashigaje indi 55 azamara afungiye mu Burengerazuba bw’Amajyepfo ya Michigan.

Iyi nkuru ivuga ko Mpamira agomba gusubizwa mu gihugu cye kuko yagiye muri Amerika akiri muto, akaba nta bwenegihugu bwa Amerika agira.

Usibye iyi minsi 180 agomba gufungwa, Mpamira yategetswe no kwishyura ihazabu y’amadolari ya Amerika 2800.